A Comisión Europea acusa a Google de abuso de posición dominante en Android
mércores, 20 de abril do 2016
A Comisión Europea iniciou o ano
pasado unha investigación formal contra Google en relación ás súas posibles
prácticas abusivas relativas a Android, e esta mañá a comisaria responsable
da Política de Competencia, Margrethe Vestager, confirmou que consideran de
xeito preliminar que Google aplicou unha estratexia en relación cos
dispositivos móbiles para manter e reforzar a súa posición dominante na procura
xeral na Internet, remitindo as súas obxeccións a Google.
En primeiro lugar, as prácticas supoñen que o buscador de Google sexa
preinstalado e seleccionado como servizo de busca web predeterminado ou
exclusivo na maioría dos dispositivos Android vendidos en Europa. En segundo
lugar, as prácticas parecen bloquear o acceso ao mercado dos motores de busca
competidores mediante navegadores móbiles e sistemas operativos competidores.
Ademais, tamén parecen prexudicar aos consumidores ao suprimir a competencia e
restrinxir a innovación no espazo móbil máis en xeral.
Vestager declarou que «cremos que a conduta de Google priva
aos consumidores de ter maiores opcións nas aplicacións e servizos para móbiles
e obstaculiza a innovación doutros interesados, infrinxindo as normas antimonopolio
da Unión Europea. Estas normas aplícanse a todas as empresas activas en Europa.
Google ten agora a oportunidade de responder as dúbidas expostas pola
Comisión».
A Comisión considera que Google ten unha posición dominante
nos mercados de servizos de procura xeral na Internet, sistemas operativos con
licenza para smartphones e tendas de aplicacións para o sistema operativo móbil
Android. Google posúe polo xeral unha cota de mercado superior ao 90 % en cada
un deses mercados no Espazo Económico Europeo (EEE).
As reticencias da Comisión Europea
No prego de cargos de hoxe, a Comisión alega
que Google infrinxiu as normas antimonopolio da Unión:
- ao esixir aos
fabricantes que preinstalen o buscador de Google e o navegador Chrome e
obrigarlles a que seleccionen nos seus dispositivos o buscador de Google de
xeito predeterminado para as buscas como condición para concederlles licenzas
de determinadas aplicacións exclusivas de Google;
- ao impedir que os
fabricantes vendan dispositivos móbiles que funcionen con sistemas operativos
competidores baseados no código fonte aberto Android;
- ao conceder
incentivos financeiros aos fabricantes e operadores de redes móbiles coa
condición de que preinstalen exclusivamente o buscador de Google nos seus
dispositivos.
A Comisión considera que estas prácticas comerciais poden
conducir a unha maior consolidación da posición dominante do buscador de Google
nos servizos de busca xeral na Internet. Á Comisión tamén lle preocupa que
estas prácticas afecten á capacidade dos navegadores para móbiles rivais para
competir con Google Chrome e que obstaculicen o desenvolvemento de sistemas
operativos baseados no código fonte aberto Android e as oportunidades que
ofrecerían para o desenvolvemento de novas aplicacións e servizos.
A Comisión considera, de xeito preliminar, que esta conduta
prexudica en última instancia aos consumidores, xa que non se lles ofrece toda
a capacidade de elección posible e impide a innovación.
- Gráfico no que a Comisión explica os reparos que ten coas prácticas de Google
A resposta de Google
Pola súa conta, Google
responde ás acusacións da Comisión Europea asegurando que Android é un
desenvolvemento aberto apoiado por numerosos socios a nivel de hardware, salientando
que o modelo que empregan con Android facilita unha grande flexibilidade para
os consumidores mantendo un coste moi reducido para os fabricantes.
Dende Google argumentan que os acordos cos seus socios son totalmente
voluntarios (calquera pode empregar Android sen Google, podendo incluso
modificar o sistema operativo como, por exemplo, fai Amazon), salientan que os
fabricantes que inclúen nos seus móbiles o conxunto de aplicacións de Google
son libres de preinstalar outras aplicacións (de feito, tenden a incluír
aplicacións como a de Facebook ou as dos operadores móbiles), lembran que aínda
que ofrezan Android de balde o seu desenvolvemento é moi custoso (pero compénsano
a través dos servizos e aplicacións que distribúen a través desta plataforma),
e non deixan de comentar o doado que resulta para os usuarios a instalación de
aplicacións nos seus dispositivos, como demostra a popularidade de aplicacións
como WhatsApp, Instagram, Snapchat... que non veñen integradas nos móbiles e
gozan de centos de millóns de descargas.
Consideran así que non están a realizar ningunha práctica contraria á
competencia, e que simplemente teñen un modelo de negocio sustentable baseado
na oferta de Android de balde para conseguir o retorno do seu investimento a
través doutras vías.