A Coruña conecta cos cómics e os videoxogos de inspiración xaponesa nunha nova edición e ExpOtaku
luns, 21 de novembro do 2022
Esta
fin de semana, do 26 ao 27 de novembro, vaise celebrar na Coruña a
nova edición dun evento que fará as delicias dos seareiros das
series, as aventuras gráficas, os cómics e demais contribucións
culturais e tecnolóxicas relacionadas coa cultura oriental. Trátase
de ExpOtaku A Coruña 2022, nova convocatoria dunha cita que reúne
cada ano máis de 25.000 visitantes chegados de todos os recantos da
xeografía galega e do resto de España e Portugal. Segundo confirmou
a organización, o Salón de
Manga, Anime, Videoxogos e Cultura Xaponesa de Galicia (ExpOtaku A
Coruña) volve neste segundo semestre de 2022 ao Recinto Feiral
ExpoCoruña, cunha edición de outono “que completa a oferta
lúdico-cultural da edición de maio”. A cita será como dixemos a
fin de semana do 26 e 27 de novembro.
Cifras
O
salón disporá de 5.500 metros cadrados de superficie feiral e conta
ademais co mellor dos precedentes: os 26.000 visitantes na edición
anterior (maio de 2022). O resto das cifras falan por si soas
respecto do nivel de impacto desta convocatoria: máis de 140
actividades ao longo de 2 días, máis de 75 expositores, 13
entidades colaboradoras de toda Galicia e máis de 500 acreditados.
Ademais, o programa inclúe os tradicionais concursos de cosplay
(disfraces), karaoke e kpop dance cover (baile), 14
torneos de videoxogos e miles de euros en premios.
A
nivel máis concreto, a axenda de actividades inclúe (entre outras
cousas) actuacións musicais, obradoiros de anime, artes marciais,
vodas frikis, charlas,
concursos, conferencias, achegamento á cultura coreana e xaponesa,
xincanas, ludoteca, experiencias de Realidade Virtual, robótica, uso
de simuladores, softcombat, obradoiros
e videoxogos. O programa artellarase en torno a dez zonas
temáticas.
O
perfil de visitantes serán mozos e mozas de entre 13 e 35 anos
(aproximadamente o 70%) e familias con nenos entre 3 e 10 anos con
entre un e dous adultos por neno ou grupo de nenos (aproximadamente o
30%).
“Un
dos maiores encantos de ExpOtaku”, explican dende a organización,
“é o seu crecente espazo para artesáns, ilustradores e novos
creadores, no que o público poderá atopar desde ilustracións
orixinais de novos autores ata creacións de ourivaría steampunk,
pasando por traballos con cristal, madeira, confección con tecidos
ou merchandising de manufactura artesanal”. Esta edición de
outono o espazo para artesáns, ilustradores e novos creadores
contará con 52 expositores.
Convidadas
e convidados
➡️
Clarice Cosplay (cosplayer)
➡️
Dragon Tearss (cosplayer)
➡️
Fatisuki (tiktoker)
➡️
Jackwise Clown (cosplayer)
➡️
Juanillo Esteban (a voz do Xabarín Club)
➡️
Luís Pousada (actor de dobraxe)
➡️
Lusesha Nyckel (cosplayer)
➡️
Nymeria Cosplay (cosplayer)
➡️
Pekebaby_ (cosplayer)
➡️
Shaun Elay (ilustradora)
➡️
Uchibros (tiktokers)
Ligazóns
A
organización habilitou varias ligazóns que cómpre ter en conta na
web do salón, non só a relativa ao
programa completo de actividades, que será de gran utilidade
para non perdernos, senón tamén a que se refire ao
listado de expositores e a como
chegar.
Horarios
Sábado
26 de Novembro: de 10:00 a 21:00 horas.
Domingo
27 de Novembro: de 10:00 a 20:00 horas.