A Deputación da Coruña convida a comezar curso cantando en galego nas redes
luns, 10 de setembro do 2018
A Deputación da Coruña quere a nosa comunidade
escolar (nenas, nenos, nais, pais, profesorado) comece o curso
cantando, e que ademais o faga en galego e nas redes. Por este e
outro motivos, a
entidade provincial fixo coincidir o inicio das clases, esta semana,
cun chamamento a participar na terceira edición do concurso Quero
Cantar, cuxa face visíbel está a pleno rendemento en
www.querocantar.gal. A web
en cuestión recolle novos azos coa devandita proclama colectiva da
Deputación mentres aínda goza do impulso brindado polas rapazas de
Máis boas cás patacas, a banda feminina de Teo que foi quen de
conseguir 25.000 visualizacións no YouTube co seu tema Son
Muller, premiado en Quero Cantar.
O chamamento da Deputación veu da man da
responsábel provincial de Cultura, Goretti Sanmartín, quen lembrou
que o 19 de outubro remata o prazo para presentar cancións á
terceira entrega do certame e que as bases poden consultarse ao
completo en www.querocantar.gal.
Tamén fixo saber que a edición dun disco
colectivo; a actuación en directo no teatro Colón da Coruña; a
gravación dun videoclip para a súa reprodución nas redes e
cantidades económicas de 1500 €, 1000 € e 500 € son algúns
dos premios do concurso Quero Cantar, que ten a súa
convocatoria aberta a grupos e solistas, con tres premios en cada
unha das categorías infantil e xuvenil.
Goretti lembrou, asemade, que o xurado estará
composto por cinco recoñecidos profesionais da música, que terán
que decidir as bandas que se inclúen no disco Quero Cantar ´18
de entre todos os que se presenten antes do vindeiro día 19 de
outubro. De entre estas, as tres primeiras clasificadas en ambas as
categorías han actuar na gala final do teatro Colón, que este ano
se vai celebrar o sábado 17 de novembro.
Amais, salientou o papel despregado por grupos
participantes no concurso (e gañadores) como Os nenos da Vella ou
Máis boas cás patacas, que “están a promover a iniciativa con
mensaxes que explican o que supuxo a participación no Quero
Cantar”. Segundo fixo saber, a pasada edición acadou “especial
repercusión tamén polo contido das cancións gañadoras”, a de Os
nenos da Vella reivindicando os beneficios de xogar na rúa con
outros rapaces, a de Máis boas cás patacas, enxalzando os dereitos
das mulleres.