A Deputación da Coruña mostra á mocidade como vivificar o galego nas redes sociais
luns, 14 de maio do 2018
Comeza a semana grande das Nosas Letras e, como
boa parte das galegas e dos galegos saben, a celebración coincide no
tempo co Día de Internet, que tamén se celebra o 17 de maio. Por
este e por outros motivos, as nosas entidades están a conmemorar a
cultura galega cun ollo posto nas redes e nos dispositivos. É
o caso da Deputación da Coruña, que deu a coñecer o pasado 12 de
maio o seu programa de actividades de celebración para a rapazada da
festa dupla do 17. Inclúense obradoiros para uso do galego nas
redes (a cargo de María Yáñez especialista en contidos dixitais),
proxeccións e charlas, ademais de concertos. Os centros neurálxicos
do programa O galego, miña lingua propia son os concellos de
Santa Comba, Arzúa, Negreira e Ames.
Segundo fixo saber a Deputación da Coruña, os
dous obxectivos básicos da campaña son “promover o uso da lingua
galega entre a poboación adolescente e aportarlle referentes cos que
valorizar e dignificar o uso do idioma de seu”. O programa de
actividades, que pon o foco no alumnado de ensino medio, estase a
desenvolver nos centros de ensino dos ditos concellos, a través de
profesionais de distintos ámbitos artísticos ou profesionais. A
vicepresidenta e responsábel das áreas de Normalización
Lingüística e Cultura da entidade provincial, Goretti Sanmartín
Rei, salientou a “especial atención do programa a se dirixir á
mocidade con experiencias próximas”.
En total, a iniciativa abrangue 91 actividades,
subdivididas en 20 modalidades. A intención é “contaxiar ás
mozas e mozos da Coruña do prestixio que supón ter unha idioma
propio como o galego”. Segundo fixo saber Sanmartín, o programa
contempla “un amplo calendario de actividades e relatorios, en que
participarán relevantes representantes do mundo da música, o
deporte, a escrita, a danza, etc., persoas colaboradoras que, ademais
de seren referentes para os mozos e mozas polas súas actividades
profesionais, tamén amosaron o seu compromiso coa lingua galega”.
Unha das accións previstas, como dixemos, ten que
ver coa necesidade de visualizar e salientar o galego nas comunidades
dixitais de meirande uso entre a mocidade. Trátase do obradoiro
Mapeando o galego nas redes, desenvolvido pola xornalista e
investigadora María Yáñez e cuxo obxectivo é “mostrar a
diversidade de contidos en galego que se poden atopar na Rede, tanto
na web como nas distintas plataformas sociais e aplicacións
móbiles”. Plataformas e aplicacións como blogs, YouTube,
Twitter, e Instagram. Comezará a actividade cunha exposición
introdutoria na que se mostrarán distintos exemplos de contido
publicado nas redes. A continuación pediráselles ás rapazas e
rapaces que busquen, anoten e recomenden unha conta ou perfil en cada
unha destas redes que lles guste, para faceren entre todas un mapeado
de contidos interesantes, que se clasificarán por tema, por franxa
de idade, por área xeográfica, etc, anotando as súas
características, e reflexionando en grupo sobre esta busca.