A Deputación de Lugo achega formación online para garantir establecementos seguros
luns, 15 de xuño do 2020
A
Deputación de Lugo comezou este luns o seu programa de formación en
actividades seguras, anti-COVID, para os profesionais e os negocios
do comercio, a hostalería e o turismo da provincia. O programa
formativo, que se desenvolve de xeito virtual, ten como obxectivo
apoiar ás empresas e o seu cadro de persoal na implantación de
medidas de prevención e hixiénico-sanitarias, garantindo a
comodidade e o benestar do cliente. Conta con 200 participantes, que
ao finalizar o plan, recibirán un diploma que os acredita como
establecementos seguros.
Esta
acción organizada pola Deputación forma parte da campaña En
Lugo, Si, que impulsa a institución para favorecer a
reactivación dos sectores produtivos dunha maneira “estábel e
eficaz ante a crise da COVID-19”.
Esta
acción realízase en liña a través de Internet a partir deste luns
15 de xuño.
O
programa consta de tres módulos. O primeiro deles chámase Regreso
con seguridade e está dirixido pola doutora en Medicina Alicia
González Antelo. O segundo titúlase Regreso con intelixencia
emocional. Dirixido pola licenciada en Psicoloxía Paloma Moure,
está centrado nas pautas de conduta e habilidades sobre as emocións
e intelixencia para manexalas con seguridade de cara ao público. O
terceiro e último bloque, Regreso e comunicación co cliente,
ten como obxectivo comunicar que a actividade está rexida pola
seguridade e a confianza sobre as bases da sinceridade e a
honestidade. Impárteo a doutora en Comunicación Mar Castro.