A Deputación de Lugo quere converter o blog de seu nunha das grandes canles informativas da provincia
xoves, 13 de novembro do 2014
A Deputación de Lugo anunciou esta semana a
remodelación da súa bitácora en liña, blog.deputacionlugo.gal,
co obxectivo de reforzar o seu papel como fonte informativa da
provincia. De feito, a intención do organismo que preside Xosé
Ramón Gómez Besteiro é
transformar o blog nunha das principais canles de coñecemento da
nosa terra. Logo da renovación, o blog amosa non só unha
feitura diferente e máis acorde coas novas correntes de deseño e
información transparente e accesíbel, senón que tamén presenta
novas funcións (plena integración coas redes sociais, máxima
usabilidade), estrutura e contidos. Estes, sinala a Deputación,
actualizaranse con máis frecuencia.
Segundo engade o organismo provincial, dende o punto
de visual o novo caderno en liña incorpora un deseño responsive,
ou sexa que é quen de afacerse aos diferentes dispositivos cos que
se pode acceder á Rede para mellorar a experiencia de navegación
dos usuarios. Ao fío disto último, a Deputación recorda que
arredor da metade dos acceso do último mes ao blog da Deputación
levouse a cabo a través de dispositivos móbiles, ben sexa mediante
teléfonos intelixentes ou ben mediante tabletas.
“Ademais das diferentes novas sobre a actualidade
da Deputación e da provincia”, explican dende a entidade que
preside Gómez Besteiro, “o blog incorpora unha axenda de eventos
totalmente renovada onde se irán relacionando todas aquelas
actividades culturais, accións formativas, convocatorias, charlas e
obradoiros que poidan ser de interese para toda a cidadanía e que se
actualizará de xeito diario”.
Logo de algo máis de 3 anos de vida, o espazo en
liña suma os 900 artigos publicados, en galego como en castelán, de
temáticas como novidades, novas tecnoloxías, medio ambiente,
cooperación, emprego, así como de curiosidades da provincia ou
descricións de lugares, festas e feiras de interese, etc. Entre as
cousas que se van incorporar á bitácora ao longo das semanas e os
meses vindeiros atópanse as vídeo novas feitas pola Fundación TIC
ou diversos acontecementos públicos en streaming, amais de
galerías de imaxes e información sobre a provincia. A maiores, a
remodelación do caderno servirá para fortalecer a presenza da
Deputación nas redes sociais. Lembrar que o organismo provincial é
a primeira Deputación de Galicia en
número de seguidores en Twitter, 4.750.