A Deputación de Pontevedra creou no que vai de ano 18 postos de traballo TIC
luns, 14 de novembro do 2016
A Deputación
de Pontevedra vén de informar do procesos seguidos para a
contratación de persoal durante os primeiros dez meses de 2016,
amais dos resultados directos destes procesos. Na análise salienta
por enriba de todo o demais o seguinte dato: ao longo do devandito
tempo foron creados 343 postos de traballo ao abeiro dos distintos
servizos e departamentos da Deputación. Segundo sinalou en rolda de
prensa a presidenta, Carmela Silva, amais da cifra en si mesma, “un
importantísimo volume de contratacións”, cómpre destacar os
procedementos empregados para levalas a bo porto: procedementos
“transparentes e cen por cen igualitarios”. Por ámbitos-servizos
de contratacións, sen dúbida os de novas tecnoloxías situáronse
entre os máis referenciais no que a cifras se refire. Recibíronse,
en total, dezaoito persoas.
A Deputación de
Pontevedra creou 80 empregos entre xaneiro e marzo, 29 en abril, 21
en maio, 49 en xuño, 40 en xullo, 12 en agosto, 43 en setembro, 57
en outubro e 12 no que levamos de novembro. En total, acadáronse os
343 postos de emprego. Amais dos servizos TIC, tamén destacaron o
Centro Príncipe Felipe (que recibiu a 83 persoas), o servizo de
Mobilidade (40), o de Promoción do Emprego e Desenvolvemento Local
(27), o de Cohesión Social e Xuventude (26), o Museo de Pontevedra
(23) ou a Estación Fitopatolóxica de Areeiro (20).
Atendendo ás
modalidades, 200 foron contratos laborais por circunstancias de
produción (outros 2 a tempo parcial), 53 funcionarios e funcionarias
interinas sen praza por execución de programas, 26 contratos de
interinidade por substitución para cubrir baixas de funcionariado
(máis 1 a tempo parcial), 26 contratos en prácticas, 15 contratos
en formación, 6 postos de funcionariado interino con cargo a
vacante, 5 interinos e interinas sen praza por acumulación de
tarefas, 4 contratos laborais por obra ou servizo determinado (máis
outros 4 a tempo parcial) e 1 contrato por interinidade a tempo
parcial de duración determinada.
