A Deputación de Pontevedra duplica a media estatal en recuperación de RAEE
xoves, 16 de febreiro do 2023
A
Deputación
de Pontevedra converteuse esta semana en referente galego e estatal
no tratamento sustentábel de refugallos RAEE (Residuos de
Aparellos Eléctricos e Electrónicos). Máis concretamente, a
institución foi destacada como “exemplo de boas prácticas” en
materia RAEE durante o transcurso dunha xornada sobre a xestión
deste tipo de dispositivos e electrodomésticos celebrada en
Vilagarcía. En termos máis concretos, foi quen de duplicar a media
española en recuperación de aparellos a través de nove puntos
limpos espallados pola provincia.
Na
xornada mostráronse as conclusións do proxecto europeo de
Estratexia Sustentábel Transfronteiriza para a Xestión dos Residuos
de Aparellos Eléctricos e Electrónicos (ESTRAEE), que a Deputación
lidera desde 2018, xunto a socios de España e Portugal.
ESTRAEE,
que contou cun financiamento de 2,15 millóns de euros, procedentes
do FEDER nun 75% do Programa de Cooperación Transfronteiriza entre
España e Portugal (POCTEP), tiña como obxectivo mellorar a xestión
e recollida de residuos eléctricos e electrónicos, así como
impulsar a xeración de emprego.
Na
cita participou a presidenta provincial Carmela Silva, acompañada
polo alcalde de Vilagarcía, Alberto Varela, e o director da
Associação de Municípios para Gestão Sustentável de Resíduos do
Grande Porto (LIPOR), Fernando Leite.
No
transcurso da xornada Silva quixo mostrar o seu “orgullo e
agradecemento” aos nove puntos limpos que participaron no proxecto
ESTRAEE (Gondomar, A Guarda, A Lama, Meaño, Nigrán, Ponteareas,
Silleda, Vilagarcía de Arousa e Mancomunidade do Morrazo), que dan
servizo a preto de 200.000 habitantes, por recuperar máis de 1.685
toneladas de residuos eléctricos e electrónicos desde 2019,
equivalente a máis de 2,4 kg por habitante e por ano. “Duplicamos
a media española, que é de 1,45 kg/habitante, e incluso triplicamos
a media galega, que se atopa en 0,84 kg. Sentídevos orgullosas e
orgullosos do traballo desenvolvido, dun traballo moi ben feito”,
subliñou a presidenta.
O
alcalde de Vilagarcía, Alberto Varela, lembrou a necesidade
de”traballar para respectar e coidar os recursos naturais, para
garantir que cheguen ás xeracións futuras en condicións óptimas,
algo para o que estamos traballando nos municipios, se ben moitas
veces sobran intencións e faltan recursos técnicos e económicos”.
Por iso, remarcou a importancia de proxectos como o ESTRAEE, que
permitiu mellorar o punto limpo de Vilagarcía, “un dos primeiros
que existiron en Galicia”, ademais de crear outro centro de
recollida de RAEE para pequenos aparellos, actuacións que se
completaron coa adquisición de puntos limpos móbiles.
Segundo
recordou, en 2022 recolléronse no punto limpo de Vilagarcía 27,3
toneladas de residuos RAEE, 10,2 de pequenos aparellos e outros 17 de
televisión, pantallas LED e elementos semellantes. “Para nós foi
un reto de xestión, que fixo preciso ampliar as instalacións,
adaptalas ás novas e numerosas categorizacións dos residuos,
mellorar as infraestruturas e o sistema de almacenamento e seguridade
dos materiais contaminantes e adaptalas aos estándares de calidade e
aos cambios lexislativos correspondentes. Puxemos todo o que puidemos
e, ademais, quero agradecer a sensibilidade e colaboración da
Deputación”.
Pola
súa parte, o director de LIPOR, Fernando Leite, explicou como a
asociación lusa introduciu a xestión de residuos na cadea de valor
a través de prácticas innovadoras. “ESTRAEE permitiunos potenciar
moito máis as prácticas de prevención de residuos, que constitúe
o piar do modelo de xestión sustentábel de recursos de LIPOR”.
Desta maneira, nos 9 “ecocentros” (puntos limpos) nos que se
actuou en Portugal reparáronse e reutilizáronse 8 toneladas de
equipos desde 2020, que tiñan o potencial de emitir 22,2 toneladas
de emisións de CO2. En total, foron 640 as toneladas de RAEE
recollleitadas. O presidente do Consello de Administración de LIPOR
e presidente da Cámara Municipal de Valongo, José Manuel Ribeiro,
que interveu a través de vídeo, lembrou que o “nivel de produción
de equipamentos eléctricos e electrónicos é un dos maiores
desafíos globais en materia de sustentabilidade” pois, sen unha
correcta xestión, “levan asociados importantes riscos para o medio
ambiente e a saúde pública”. Por iso considera vital o labor
realizado a través do ESTRAEE, que lles permitiu “dar importantes
pasos na xestión municipal deste residuos, promovendo ademais unha
maior circularidade”.