A Deputación de Pontevedra enxalza o carácter único e pioneiro da rede SmartPEME
mércores, 17 de xuño do 2020
A
nova
sede en Vigo da rede SmartPEME, a rede de capacitación tecnolóxica
das empresas, os profesionais e os autónomos da provincia, recibiu
este mércores 17 a visita da presidenta da Deputación de
Pontevedra, Carmela Silva, quen acudiu xunto coa deputada de
Novas Tecnoloxías, Ana Mejías. Xuntas enxalzaron o programa
SmartPEME da entidade provincial, unha fonte de “grandes beneficios
para a sociedade” e unha iniciativa única en Galicia, sinalaron,
ao tempo que fixeron fincapé na súa capacidade para introducir
todos os elementos TIC nas pequenas e medianas empresas e nas
actividades que realizan autónomas e autónomos.
Durante
a visita, a presidenta provincial informou que cada ano aumenta a
utilidade do programa de SmartPEME: “En 2020 temos dous servizos
novos, un dedicado ao comercio e outro ao terceiro sector".
En
canto ao comercio, a Deputación está traballando no proxecto de
aceleradoras, facendo un seguimento para que as 10 empresas
seleccionadas poidan acabar este proceso “sendo moito máis
potentes e tendo un proxecto moi ligado ás TIC”, subliñou a
presidenta.
No
que ten que ver coa promoción da economía social, do terceiro
sector, Carmela Silva destacou que “estamos a traballar para que
ninguén quede atrás, o terceiro sector está a desenvolver
proxectos moi potentes e queremos axudar para que dean ese salto cara
á internacionalización e competitividade, creando máis negocios e
polo tanto xerando máis emprego”.
Balance
de actividades
En
canto aos datos concretos da sede de Vigo dende o ano 2016
realizáronse 1.526 asesoramentos a 933 empresas e 243 obradoiros aos
que asistiron preto de 2.000 persoas. Ademais, durante o plan de
continxencia COVID fixéronse 202 asesoramentos a 123 empresas e, en
canto a TurisTIC realizáronse 65 asesoramentos a 53 empresas.