A Deputación de Pontevedra prorroga por dous anos máis o contrato con Iberbanda
xoves, 10 de marzo do 2016
A Deputación
de Pontevedra anunciou estes días que vén de prorrogar por dous
anos máis o seu contrato coa compañía Iberbanda, que como
lembraremos é a responsábel da explotación da Rede Pontevedra
Banda Larga Rural (REPOBLAR).
Segundo recorda o organismo provincial que preside Carmela Silva, a
rede WiMAX da Deputación (impulsada pola institución pontevedresa
grazas ao cofinanciamento do 70 % con fondos FEDER da Unión
Europea), ten por obxectivo dotar de banda larga sen fíos ás zonas
rurais da provincia, e todo a prezo accesíbeis. O proxecto europeo
REPOBLAR, que conta cun orzamento de 6.693.868,53 euros, abrangue 55
concellos da provincia (agás Vigo, Pontevedra, Vilagarcía de
Arousa, A Estrada, Marín, Redondela e Cangas, que non se adheriron).
Segundo informa a Deputación a rede explotada por
Iberbanda desde hai catro anos fornece cobertura ao 99 % da poboación
dos 55 concellos, un total de 7.760 clientes. A compañía de
telecomunicacións, durante dous anos máis, encargarase de
subministrar, explotar e manter a infraestrutura e o servizo
(asumindo os custes de conservación, amaño e ampliación precisos
para “a correcta prestación do mesmo”). Iberbanda tamén
proseguirá asumindo labores de comercialización e de xestión dos
contratos de alta, baixa ou modificación, facturación, atención e
soporte aos clientes e a correcta prestación do servizo.
Segundo conclúe a Deputación facendo referencia a
novas vantaxes para os usuarios, a través desta prórroga de dous
anos o organismo provincial conseguiu que Iberbanda oferte, sen
ningún custo asociado e coas mesmas condicións de servizo e
calidade, unha mellora no prezo do servizo de 2 Mbps, pasando dos
41,14 euros mensuais que pagaban os clientes aos 30,25 € (IVE
incluído).