A Deputación de Pontevedra quere afinar tecnoloxías para impulsar o turismo
luns, 9 de xaneiro do 2017
A Deputación de Pontevedra vai facer fincapé nas
novas tecnoloxías para a súa actividade vindeira en materia de
promoción turística. Así
o vén de acordar a xunta de Goberno da entidade provincial, que
aprobou o expediente para a contratación con procedemento aberto do
servizo de recadación do Plan Estratéxico de Turismo Rías Baixas
2017-2020. Este, dotado cun orzamento de 78.650 euros, forma
parte dunha estratexia que en palabras da Deputación é, ante todo,
“unha nova forma de facer política turística, máis e mellor
planificada e con meirandes recursos para que o sector privado e o
público traballen da man”. Segundo fixo saber a presidenta da
entidade provincial, Carmela Silva, as empresas que se presenten ao
concurso para a redacción do dito plan deberán realizar un
diagnóstico exhaustivo da situación actual do sector turístico da
provincia. Inclúese neste punto, entre outras moitas cousas, unha
enquisa en liña para tomarlle o pulso ás empresas do sector e unha
análise pormenorizada da contorna tecnolóxica e as canles de
mercadotecnia máis eficientes.
Máis en detalle, as firmas terán que realizar un
traballo de campo co sector privado, coñecer as súas necesidades e
expectativas, realizar entrevistas personalizadas coas asociacións
turísticas da provincia e con 40 empresas como mínimo dos
diferentes sectores asociados á oferta turística, así como unha
enquisa dixital a unha mostra representativa das empresas do sector e
a organización de, ó menos, unha mesa de traballo en cada comarca.
Igualmente, terán que analizar as características
da demanda turística, da oferta e infraestruturas e dos servizos
turísticos, así como da competencia e da cadea de valor. Amais
realizarán tamén unha análise da xestión da información e dos
recursos para atraer turistas e asegurar o seu regreso; estudarase o
entorno social, económico ou tecnolóxico que pode influír no
desenvolvemento turístico; as canles de distribución comercial e
promocional e todos os axentes que teñen relevancia en materia
turística, para o que se elaborará unha ficha específica
individual con información sobre a súa influencia; a canle de
comunicación máis eficiente; as tendencias actuais en ámbitos
semellantes á provincia de Pontevedra; o diagnóstico global do
destino e os aspectos a ter en conta na definición do modelo
turístico da provincia.