A Deputación de Pontevedra, recoñecida polo Consello de Contas polo impulso á eAdmnistración
luns, 2 de xaneiro do 2023
A
Deputación
de Pontevedra recibiu un recoñecemento do Consello de Contas polo
seu traballo en materia de eAdministración (Administración
Electrónica), impulsando no seu seo e nos concellos un novo xeito de
establecer relacións coa cidadanía (máis áxil, transparente,
cómoda, segura e eficiente). O recoñecemento consta no último
informe do Consello sobre o grao de transformación tecnolóxica das
entidades locais, análise na que se conclúe “que a Deputación de
Pontevedra ostenta o liderado en Galicia no impulso á dixitalización
dos concellos da provincia, dado que, ademais de prestar asistencia a
tódolos municipios solicitantes, é a única deputación galega que
fai informes periódicos de seguimento e que ostenta certificación
de calidade”.
O
Consello de Contas valora especialmente “que a pontevedresa é a
única Administración provincial no seguimento do avance da
dixitalización dos concellos”. Ademais, dispón de carta de
servizos que recolle a declaración de compromisos de calidade na
prestación aos concellos de entre 10.000 e 20.000 habitantes (aínda
que, de feito, se presta aos concellos de ata 50.000 habitantes).
Ademais,
só a Deputación de Pontevedra cumpre todos os requisitos de
calidade esixidos, polo que obtivo unha certificación de cumprimento
da norma ISO.
Actualmente,
54 concellos dos 61 que compoñen a provincia tramitan expedientes
electrónicos e están así en condicións de cumprir coas esixencias
da Lei 39/2015 de Procedemento Administrativo. A Administración
provincial avalía periodicamente os servizos prestados, por exemplo
o soporte para mantemento ou a resolución de incidencias, e,
ademais, abre aos concellos a posibilidade de propoñer melloras ou
novas ferramentas. Tamén se ocupou da formación do persoal
municipal de tódolos concellos adheridos, así como dos cargos
políticos.