A FIC acolle o día 15 unha xornada de programación e robótica para os cativos
martes, 13 de outubro do 2015
A Facultade de Informática da
Universidade da Coruña organiza o vindeiro día 15 de outubro unha
xornada dirixida a amosar en detalle “a parte máis lúdica e
educativa da informática”. Ou sexa, a programación e a robótica,
dúas cuestións de gran interese para a educación dos nosos
escolares, tanto dende o punto de vista creativo e formativo, como no
que se refire á actividade laboral futura das nenas e nenos (que en
maior ou menor medida apoiarase no uso das novas tecnoloxías). Os
actos comezarán a partir das 17:00 horas e están encamiñados a
rapaces en idades escolar e “a calquera que queira iniciarse neste
ámbito”.
Segundo informa a
FIC, amosaranse
cousas
como robots baseados nos
módulos de Lego MindStorms (robots
de iniciación) e outras construcións “máis
avanzadas”,
como os robots NAO desenvolvidos
pola firma Aldebarán Robotics e con capacidade para escoitar, ver e
falar (facultades algunhas delas visíbeis, precisamente, nun
vídeo da propia Facultade de Informática).
Volvendo á
xornada,
sinalar
que no seu transcurso
Pablo Espeso impartirá unha charla na que explicará as técnicas
que se poden usar neste mundo, desde Scratch a Arduino pasando por
Codeacademy ou Codecombat.
Dentro dos actos desta xornada, que se
enmarca na celebración da Semana Europea da Programación,
presentarase a II edición da First Lego League que terá
lugar na Facultade de Informática. A primeira edición da FLL reuniu
o pasado mes de febreiro a máis de 150 nenos e nenas con idades
comprendidas entre os seis e os dezaseis anos no Campus de Ferrol.
Organizado conxuntamente pola Escola Universitaria Politécnica, a
Escola Politécnica Superior e a Facultade de Informática, a First
Lego League conta cunha parte de competición de robots feitos
con pezas de Lego e outra de presentación de proxectos científicos
que deberán responder á pregunta de que é o que quere aprender a
xente nova e como queren que se lles ensine.