A Fundación Aldaba pon en marcha a súa estratexia dixital grazas a Fondos Europeos

A Fundación Aldaba, con sede na nosa terra, puxo en marcha a súa estratexia de transformación innovadora grazas ao proxecto Aldaba Dixital: Transformándonos e empoderando persoas. Os obxectivos principais do programa estratéxico son mellorar a calidade de vida das persoas usuarias dos programas e centros da fundación con novos procesos e produtos dixitais, incrementar a eficacia e eficiencia da entidade e garantir a seguridade dixital.
Este proxecto foi presentado na convocatoria aprobada pola orde DSA/1110/2022, do 17 de novembro, pola que se establecen as bases e convócanse subvencións para o apoio e a modernización das entidades do terceiro sector, financiadas a cargo do Fondo Europeo de Recuperación, Transformación e Resiliencia. Tras a súa aprobación definitiva o pasado 18 de maio de 2023, Fundación Aldaba comeza a dar os pasos para conseguir a súa plena dixitalización.
O Plan de Transformación Dixital de Aldaba foi aprobado en outubro de 2022, composto por 14 accións. Estas enfocaranse en 5 ramas principais de mellora: infraestruturas (hardware), aplicacións (software), formación, seguridade e interacción social.
Na área de infraestruturas, traballarase sobre aspectos como a virtualización de escritorios de traballo críticos ou a incorporación de tecnoloxía de Realidade Virtual nos procesos de atención a persoas. “Para isto”, explican, “é fundamental apostar tamén pola área de aplicacións, onde se desenvolverá un portal de información para o voluntariado e unha aplicación de xestión de expedientes de usuarios, entre outras accións”.
En canto á rama de interacción social, desenvolveranse redes sociais específicas para diferentes colectivos, como persoas con capacidades diferentes ou nenos, nenas e adolescentes con medidas de protección.
Todo iso complementarase con medidas destinadas á seguridade, como a prevención da ciberdelincuencia, e á formación, a través da mellora das competencias dixitais de usuarios e empregados.
Os focos de actuación aos que se destinarán todas estas actuacións son as persoas usuarias dos programas e centros da fundación e os seus procesos de traballo e infraestrutura.
Fundación Aldaba é unha entidade privada, sen ánimo de lucro, independente, que nace en 1999 co propósito de contribuír á mellora social e desenvolvemento das persoas máis vulnerábeis. Actualmente desenvolve as súas actividades nas áreas de Apoios e Curatela de Persoas Adultas con Discapacidade, Protección de Menores, Emancipación, Inserción Socio Laboral de Persoas con Discapacidade e Violencia de Xénero en Galicia, Illas Baleares e a Comunidade de Madrid.