A Fundación INADE achéganos o día 12 ás posibilidades empresariais do Big Data
venres, 8 de xullo do 2016
- O experto en Big Data Juan José Casado Quintero
O vindeiro martes 12 de
xullo a
tribuna informativa Almorza con
INADE - A Coruña recibe a visita de Juan José Casado
Quintero, director corporativo de Datos e Analítica en Sanitas, que
abordará a aplicación das posibilidades dos datos masivos (Big
Data) no mundo empresarial. O relatorio de Quintero, que fará un
repaso pola revolución que supuxo a entrada do tratamento e xestión
da información masiva en todos os mercados, vén da man da Fundación
INADE (Instituto Atlántico do Seguro) e celébrase no Hotel Attica
21 da Coruña. Previa á exposición do directivo de Sanitas, a
presidenta da Asociación Española para a Intelixencia Artificial e
Catedrática de Ciencias da Computación e Intelixencia Artificial da
UDC, Amparo Alonso, exporá unhas liñas de reflexión en torno á
análise de Big Data. Como lembraremos, Amparo
Alonso é tamén responsábel da Área Tecnolóxica de Intelixencia
Artificial do CITIC.
Segundo informa INADE, a
información masiva é un dos conceptos de moda no mundo informático.
O seu obxectivo, do mesmo xeito cós sistemas analíticos
convencionais, “é converter o dato en información que facilite a
toma de decisións, mesmo en tempo real, converténdose ademais nunha
oportunidade de negocio”, explica a fundación, que engade que
arestora xa hai unha chea de empresas tirando proveito dos recursos
avanzados de Big Data. As consecuencias directas disto (e
tamén as potencialidades a curto, medio e longo prazo) serán en boa
medida o eixe temático do relatorio de Casado, que centrará a súa
intervención, tamén, en analizar o obxectivo da captura,
transformación, almacenamento, análise e visualización dos datos.
Juan José Casado é
licenciado en Administración de Empresas na Universidade Complutense
de Madrid e MBA na IE Business School. É experto en datos e
analítica, con catorce anos de experiencia en consultoría enfocada
a axudar a empresas de diferentes ámbitos a obter o máximo valor
dos seus datos. Dirixiu equipos de investigadores en CFI Group,
Cognodata, Everis e IBM. Desde 2015 adicouse a transformar a análise
de datos na contorna sanitaria. Na actualidade, ocupa o posto de
director corporativo de Datos e Analítica en Sanitas.
A sesión celebrarase
pola mañá na sede da Fundación (Hotel Attica 21). Ademais de
profesionais do sector asegurador, a xornada diríxese a empresas e
directivos, responsábeis de información e informática, entidades
aseguradoras e mediadores de seguros.