A Fundación TIC centrará boa parte dos seus esforzos no emprego e na igualdade de oportunidades
martes, 17 de novembro do 2015
A Fundación para o
Desenvolvemento das Tecnoloxías da Información e a Comunicación
(TIC) de Lugo como entidade sen ánimo de lucro que é segue adiante
co seu obxectivo de promover e levar a cabo actividades encamiñadas
ao fomento da educación, a investigación e o desenvolvemento das
novas tecnoloxías, así como da denominada Sociedade do Coñecemento,
de maneira que se contribúa a mellorar a formación relativa a estas
tecnoloxías na provincia de Lugo. Segundo
vén de informar a Deputación de Lugo (da que depende a Fundación),
aprobouse un orzamento para 2016 por parte da TIC por valor de
1.802.395 euros. O presidente da entidade e da Deputación, Darío
Campos, valorou o traballo que vén desenvolvendo a TIC nos últimos
oito anos, defendendo “a igualdade de oportunidades como un piar
fundamental do sistema educativo”.
Cómpre informar que unha
parte das actividades da TIC estarán enfocadas a garantir un ensino
de calidade adaptado ás demandas dun sector en continuo cambio.
“Unha das nosas prioridades é o emprego, polo que reforzaremos as
prácticas dos nosos alumnos en escenarios reais e as actividades
complementarias coa experiencia de profesionais de prestixio para que
teñan a formación axeitada á demanda do mercado”, engadiu
Campus. Amais, avanzou que “dentro deste obxectivo, seguiremos a
traballar para acadar convenios con empresas do sector audiovisual, a
través da Escola ou da Lugo Film Commission, coa finalidade de
achegar experiencia laboral ao noso alumnado e titulados”.
O presidente do organismo
provincial tamén fixo fincapé no labor que está a desenvolver o
Centro de Innovación Social, InLugo, e a alta demanda para
participar nas súas actividades (máis de 1.600 inscricións este
ano). Anunciou tamén que en 2016 “incrementaremos a presenza do
InLugo con actividades formativas en diversos puntos da provincia co
obxectivo de facilitar a todos os lucenses maiores de 55 anos o
acceso ás novas tecnoloxías, independentemente do lugar no que
residan”.
En 2016 a TIC tamén
centrará parte do seu traballo no labor social a través do apoio a
organizacións sen ánimo de lucro.
Por último, engadir que
na reunión deste luns acordouse a continuidade de Margarita Soilán
Carbia como xerente da Fundación TIC e a incorporación do Deputado
Miguel Ángel Sotuela ao Padroado, do que tamén forman parte como
patróns Álvaro Santos, Ramiro Moure, Xosé Ferreiro, Jorge Coira e
Arturo Vaquero.