A Galipedia chega aos 200.000 artigos
luns, 30 de outubro do 2023
Este
outubro pasará á historia da lingua e cultura galegas como o mes no
que a Galipedia
chegou aos 200.000 artigos. O fito, concretamente, acadouse este
ventres 27 de outubro, cando a versión en galego da popular
enciclopedia en liña Wikipedia chegou á dita de cifra de
publicacións. Fíxoo no ano do seu 20º aniversario e cun artigo
relacionado coa diversidade biolóxica.
Moito
máis ca un bo número de artigos
Segundo
explica o equipo coordinador da Galipedia, esta “é moito máis que
un bo número de artigos que abranguen todas as áreas de
coñecemento, dende as ciencias ou as artes ata a xeografía, a
historia ou os deportes, exercendo un importante papel a prol da
normalización do galego que foi recoñecido co Premio Xoán Manuel
Pintos da cidade de Pontevedra ou o Premio Rosalía de Castro de
Lingua concedido pola Deputación da Coruña”.
Nos
últimos anos, explica o equipo da Galipedia, a enciclopedia online
galega mergullouse nun proceso de mellora que puxo o foco en acadar a
máxima calidade nas entradas novas. “Froito disto creáronse máis
de 240 artigos de calidade (a máxima distinción que un traballo
pode acadar por parte da comunidade) e máis de 100 artigos bos,
moitos deles creados dentro do propio proxecto e outros moitos
traducidos doutras linguas”.
E
engaden: “Traballamos de continuo na mellora dos distintos artigos
corrixindo a súa ortografía ou actualizándoos, entre outros
traballos, ademais estamos a preparar a aplicación dunha ferramenta
que actualice de xeito automático algúns datos dos artigos como a
poboación das cidades ou países de todo o mundo”.
Todas
as parroquias das provincias da Coruña e Pontevedra cubertas
O
equipo, de todos esforzos despregados nos últimos anos, destaca a
relevancia de traballos como o realizado por numerosas persoas do
proxecto para ilustrar os artigos de todas as parroquias de Galicia,
tendo cubertas xa todas as parroquias das provincias de Pontevedra e
da Coruña, e boa parte das de Lugo. Ademais, a través da conta de
Instagram de wikipedia_en_galego tamén se conseguiu ilustrar un
número moi significativo de artigos biográficos, e presenta
curiosidades, imaxes destacadas, temas de actualidade que se tratan
na enciclopedia, entre outras moitas cousas.
Ademais,
aclaran, “un dos obxectivos da Galipedia é a loita contra a fenda
de xénero, tentando reducila mediante a creación de biografías de
mulleres e temas relacionados como o deporte feminino, se ben o
camiño que queda por percorrer é aínda longo”.
Precísanse
máis colaboradores
O
equipo da Galipedia, malia os diferentes motivos de celebración, non
agocha a súa preocupación sobre o futuro do proxecto: “A día de
hoxe, e a pesar das cifras acadadas, a Galipedia enfróntase á
dificultade de conseguir máis persoas que colaboren co proxecto para
poder seguir medrando en cantidade e en calidade, comezar a editar é
moi sinxelo e sempre haberá algunha persoa con experiencia para
axudar a quen se decida a comezar”.