A Nosa Terra premia o apoio dos seus lectores nas redes sociais

A Nosa Terra segue adiante na Internet e semella que atopa nas redes sociais o mesmo apoio das lectoras e dos lectores que tiña antes de que se deixase de publicar en formato papel. Para recoñecer esta fidelidade da comunidade internauta galega, o xornal en liña organizou neste mes de decembro un sorteo de libros das coleccións propias de seu, dándose a casualidade de que os gañadores son seareiros de Edicións A Nosa Terra nas redes sociais, máis polo miúdo no Facebook e máis no Twitter, canles onde o medio ten arestora 3.960 e 657 seguidores, respectivamente. Os nomes dos internautas premiados con cadanseu lote de libros son Siso GC, Moraima Pérez, Adela Estévez Campos, Xosé Vázquez Dorrío, Xoán M. Fernández, Filipe Díez e Antonio Peleteiro.
Segundo fai saber o xornal en liña, as redes sociais estanse a converter nun importante apoio para afianzar o futuro das publicacións tradicionais. No caso do medio galego, o interese dos lectores medra, e con el o número de novas que se publican primeiro na páxina web de A Nosa Terra e logo en Facebook grazas ás utilidades “gústame” ou “compartir”. A media de lecturas nesta rede social das principais novas de ANT chega aos 7.000 impactos diarios de media e medra de continuo desde o verán, cóntase.