A OCU advirte: a gran maioría das aplicacións que mudan a cor do Facebook son unha fraude
venres, 4 de setembro do 2015
A Organización de
Consumidores (OCU) está a advertir estes días dos
riscos para os nosos equipos (e para a nosa economía) de responder
aos reclamos que na Internet ofrecen mudar a cor do noso Facebook,
cousa que “pode saírnos máis cara do que semella nun principio”,
sinala a plataforma, que lembra que a inmensa maioría destes
chamados son falsos e non pretenden outra cousa que facerse cos nosos
cartos. Para evitar riscos, OCU desaconsella acceder a este tipo de
aplicacións, xa “que nos arriscamos a ficar subscritos a un
servizo Premium de mensaxes”.
Malia todo, a
organización tamén informa que non todas as ferramentas son falsas,
hainas que si que cumpren o seu cometido. Porén, por tan pouca cousa
(mudar a cor do Facebook), mellor aturar a tonalidade que vén de
serie na rede social.
Segundo lembra a OCU,
“cóntanse por milleiros as aplicacións fraudulentas que prometen
cambiar a feitura da conta de Facebook e que só serven, ao final,
para facer subscricións de mensaxes que poden saírnos por 40 euros
ao mes”.
A plataforma, por outra
banda, recomenda ás persoas que xa accederon a estes servizos
facilitando o número de teléfono de seu que contacten coa firma
telefónica que lles dá servizo e lle pidan a comprobación da
subscrición non autorizada. Se a resposta é positiva, o máis
indicado é solicitar a baixa. A OCU desaconsella facilitar o noso
número de teléfono se “estamos completamente certos de a onde
accedemos”, en Facebook, Twitter, WhatsApp ou en calquera outra
plataforma.