A Orquestra Vigo 430 e o MUVI xuntan música e videoxogos nun concerto sinfónico o día 23
luns, 12 de decembro do 2022
Vigo
vai acoller o 23 de decembro un concerto que fai confluír nunha
única cita cultural os ámbitos da música sinfónica contemporánea
e o do lecer dixital. Virá da man da Orquestra Vigo 430 e o Museo do
Videoxogo e celebrarase no Auditorio Mar de Vigo o venres 23 de
decembro ás 20:00h.
En
palabras do MUVI “trátase dun revolucionario concerto onde
poderemos presenciar unha viaxe pola historia da música moi
diferente á que estamos acostumados, xa que porá o foco na música
que se empregou ao longo do século XX e parte do XXI no eido dos
videoxogos, ofrecendo aos asistentes un espectáculo para todos os
públicos de índole musical, cultural, sociolóxica pero tamén
tecnolóxica e mesmo histórica”.
En
concreto, será unha oportunidade para desfrutar coa interpretación
musical da Orquestra Sinfónica Vigo 430, dirixida por Isabel Rubio,
que interpretará as composicións que Brais González Pérez creou a
partires dos temas musicais máis destacados do mundo dos videoxogos,
estruturados nunha ducia de bloques, tal e como recolle o proxecto
deseñado por Erea Carbajales Molina, e tendo como convidado especial
ao youtubeiro e gamer León Picarón, especializado en
Sonic, e que xogará a diversos videoxogos, ó fío desta
interesante proposta.
As
entradas poden adquirirse a través da web Ticketrona.com
e na web da Orquestra Vigo 430.
Este proxecto conta co apoio da Fundación Museo do Videoxogo de
Galicia, xestora do MUVI -o primeiro Museo aberto en España adicado
á historia do videoxogo- que respalda e colabora na iniciativa,
avalando coa súa experiencia e coñecementos a proposta da Orquestra
Sinfónica Vigo 430.
Amais, sinalar que o
concerto poderá seguirse en streaming na web e no Facebook da
Orquestra Vigo 430 e tamén a través da plataforma Tolemias.tv,
onde ficarán ao dispor de todos aqueles que queiran volver velos.