A RTC presenta un titorial para atopar traballo na Rede
martes, 14 de xullo do 2009
- Presentación Programa Multimedia de Formación no Telecentro de Santiago de Compostela
A Rede de Telecentros de Comunicación de Galicia (RTC) vén
de anunciar que mañá mércores, 15 de xullo, no marco da campaña Comunícate, vai levar a cabo a
presentación dun titorial sobre Como atopar
traballo na Rede, que ten como
principal obxectivo facilitarlle aos usuarios e usuarias o coñecemento e uso
das novas tecnoloxías no ámbito da comunicación, e en concreto, no eido
laboral.
Segundo afirman os responsables desta campaña,
desenvolvida pola Secretaría Xeral de Medios para dar a coñecer a Rede de
Telecentros de Comunicación de Galicia (RTC), “nunha coxuntura como a actual, marcada por unha crise económica e
laboral, faise necesario buscar alternativas ao xeito tradicional de atopar un
posto de traballo. Neste contexto, Internet configúrase como unha ferramenta
útil para chegar, sen moverse do sitio, a un amplo abano de empresas de todos
os sectores, ben a través dos portais específicos, das webs de administracións
públicas ou das propias empresas que oferten o emprego”.
- O titorial poderase seguir dende o telecentro de Melide, entre outros
A xornada poderase seguir a través de
videoconferencia nos Telecentros de Comunicación de Oroso, Vimianzo, Ourense,
Lugo e Melide, onde os interesados
poderán traballar co titorial e coñecer de primeira man as vantaxes do
emprego das novas tecnoloxías e Internet aplicadas á nosa vida cotiá.
A través da campaña Comunícate, o
persoal da Secretaría Xeral de Medios pretende que os Telecentros de
Comunicación (TC) se incorporen como alternativa habitual na axenda de tempo
libre da cidadanía e que se constitúan como puntos de referencia de acceso ás novas tecnoloxías no ámbito da
comunicación.
O acto terá lugar ás 10:30 horas no Centro Multimedia de Galicia de
Santiago de Compostela, na rúa do Hórreo, 61, e a el acudirán, entre outras
persoas, Felicitas Rodríguez, xefa do Servizo de Programación
Multimedia-Secretaría Xeral de Medios e María Otero Reboiras, Xefa do Servizo
de Xestión e Coordinación da Subdirección Xeral de Colocación.
Os interesados poden informarse e
inscribirse no teléfono do CAU 902 922 270, ou a través do correo electrónico.