A Rede CeMIT de AMTEGA asume a secretaría da organización estatal Somos Digital
luns, 4 de abril do 2022
A
14ª asemblea da Asociación
Somos Digital, que agrupa 15 entidades do ámbito estatal baixo o
obxectivo común de “acelerar e dar soporte á formación en
competencias dixitais da cidadanía” (con especial atención ás
contornas rurais e aos colectivos en risco de exclusión), renovou
a súa xunta directiva, asumindo a Rede CeMIT da axencia galega
AMTEGA a secretaría da organización.
Con
ocasión da asemblea, a Axencia para a Modernización Tecnolóxica de
Galicia presentou a súa axenda de actividades do Día de Internet,
que este ano coordina Galicia a través da Rede CeMIT, e que, ao
longo dos vindeiros meses de abril e maio, “encherá o calendario
de eventos e seminarios en liña” baixo a temática Tecnoloxías
dixitais para as persoas maiores e o envellecemento saudábel.
No
encontro de Madrid aprobouse o novo Plan Estratéxico 2022-2025 da
asociación, en cuxa redacción participou a Rede CeMIT e no que a
entidade aborda cinco liñas estratéxicas que apostan “por
impulsar e ser un referente no desenvolvemento das competencias
dixitais segundo o marco Europeo DigComp”, por “incrementar a súa
incidencia institucional e política”, por “aumentar a xestión
profesionalizada da entidade e o intercambio de coñecemento e
experiencias en rede”, así como “por fortalecer a comunicación
tanto interna como externa e facer un especial esforzo no
acompañamento e reforzamento da figura dos dinamizadores dixitais,
esenciais na actividade de Somos Dixital e, dentro dela, da Rede
CeMIT de Galicia”, explicaron fontes da axencia autonómica que
dirixe Mar Pereira.
A
Asociación Somos Digital está conformada por máis de 1.500 Centros
de competencias Dixitais, espazos públicos de acceso libre que poñen
en marcha proxectos e iniciativas que conectan e capacitan ás
persoas a través das TIC. Galicia, a través da Rede CeMIT, forma
parte deste colectivo dende 2009.