A Toxa acolle o día 30 a XXI Noite Galega das Telecomunicacións
luns, 19 de setembro do 2016
- Vista do Gran Hotel da Toxa, sede da celebración
O vindeiro día 30 de
setembro terá
lugar no Gran Hotel da Toxa (O Grove) a XXI Noite Galega das
Telecomunicacións e da Sociedade da Información. Trátase dun
evento xa histórico no ámbito galego e estatal das novas
ferramentas dixitais: a nova edición dun encontro no que se xuntan
boa parte dos nosos profesionais e das nosas empresas máis
referenciais do ámbito das comunicacións avanzadas, o coñecemento
e a innovación. A Noite, organizada un ano máis polo Colexio
Oficial e a Asociación de Enxeñeiros de Telecomunicación de
Galicia (COETG-AETG), servirá tamén para visualizar e recoñecer o
esforzo innovador das nosas empresas, profesionais, organizacións e
investigadoras/es. De feito, no seu marco celébrase a entrega dos
Premios Galicia das Telecomunicacións e da Sociedade da Información.
Destes
galardóns falamos recentemente en Código Cero, dando conta das
resolucións do xurado e, polo tanto, das identidades das empresas,
institucións, organismos e investigadores premiadas/os no certame.
Por certo que esta 21
edición do evento xirará baixo o lema A transformación dixital.
O desafío 4.0. Con este
epígrafe, a organización quere subliñar a importancia da
integración de sectores tan estratéxicos como o económico,
servizos e industrial coa sociedade tecnolóxica, “en aras dunha
nova economía dixital e sustentábel”.
O comezo da Noite está
previsto para as 20.00 horas co cóctel de benvida aos asistentes e
as sesións de networking. Ás 21.30 realizaranse as
presentacións do evento (facendo fincapé no lema que o acompaña e
nos concepto que abrangue este lema) e, logo, a entrega de
recoñecementos dos Premios Galicia das Telecomunicacións. Ás 23.00
horas está previsto que comece a cea de gala.