A UDC impartirá o vindeiro curso mestrados en información cuántica e patrimonio cultural dixital
luns, 17 de xullo do 2023
A
Universidade da Coruña impartirá a partir de setembro catro novas
titulacións oficiais de mestrado (máster).
Trátase dos mestrados universitarios en Xestión Sustentábel da
Auga; Ciencia e Tecnoloxía da Información Cuántica; Patrimonio
Cultural Dixital, e Fabricación Aditiva, que veñen sumarse a “unha
ampla e variada oferta que supón un total de noventa e dous títulos,
repartidos entre os dous campus universitarios”, segundo informou a
UDC.
Na
Coruña, a Facultade de Informática acollerá o Máster
Universitario en Ciencia e Tecnoloxía da Información Cuántica e o
Máster Universitario en Patrimonio Cultural Dixital, con oito e 12
prazas respectivamente; mentres que o Máster Universitario en
Xestión Sustentábel da Auga, con 10 prazas, será impartido na
Escola Técnica Superior de Enxeñaría de Camiños, Canais e Portos.
Pola súa banda, a Escola Politécnica de Enxeñaría de Ferrol será
a sede do Máster Universitario en Fabricación Aditiva, que oferta
10 prazas.
Con
estes catro novos títulos, a UDC supera as mil seiscentas prazas
postas a disposición do alumnado que busca engadir aos seus estudos
de grao unha formación avanzada, dirixida á especialización
académica ou profesional. En concreto, 1.636 prazas que recibiron xa
un total de 2.500 solicitudes no primeiro prazo ordinario de
preinscrición, o que inclúe as solicitudes do alumnado con títulos
universitarios de sistemas educativos do Espazo Europeo de Educación
Superior ou homologados ou declarados equivalentes.
O
Máster Universitario en Xestión Sustentábel da Auga está dirixido
principalmente a profesionais do eido da xestión da auga e a
titulados/as da rama de enxeñaría e de ciencias que queiran
desenvolverse laboralmente neste campo.
No
Máster Universitario en Ciencia e Tecnoloxía da Información
Cuántica o perfil de ingreso recomendado é o de titulados
universitarios no eido das ciencias (principalmente Física pero
tamén Química, Matemáticas, Nanociencia e Nanotecnoloxía e outras
titulacións relacionadas) e da enxeñaría (principalmente Enxeñaría
Informática e Enxeñaría de Telecomunicacións, pero tamén
Enxeñaría Industrial, Enxeñaría Aeroespacial, Enxeñaría Física
e outras titulacións relacionadas), Nun sentido máis concreto, son
precisos coñecementos no eido das Matemáticas (álxebra lineal,
análise, probabilidade) e aconsellables en programación básica.
O
Máster Universitario en Patrimonio Cultural Dixital terá prioridade
de acceso para graduados das áreas de coñecemento de Artes e
Humanidades, Ciencias Experimentais, Ciencias Sociais e Xurídicas e
Enxeñaría e Arquitectura, incluídos aqueles con títulos con
denominacións equivalentes ou alternativas ás que compoñen estas
áreas. Tamén poderán ser admitidos estudantes procedentes doutros
títulos universitarios sempre e cando o perfil do seu currículum
acredite os coñecementos mínimos para cursar os estudos do
mestrado.
No
Máster Universitario en Fabricación Aditiva as persoas que queiran
ser admitidas deberán estar preferentemente en posesión dun grao do
eido industrial (graos en Enxeñaría Mecánica, en Enxeñaría en
Electrónica Industrial e Automática, en Enxeñaría en Tecnoloxías
Industriais, en Enxeñaría Eléctrica, en Enxeñaría de Química
Industrial, en Enxeñaría da Organización Industrial, de Enxeñaría
en Deseño Industrial e desenvolvemento de produto, en Enxeñaría
Biomédica e en Enxeñaría de Minas e Enerxía.
A
relación dos mestrados da UDC figura pormenorizada na
web da UDC.