A UDC organiza un encontro virtual arredor do xigantesco paso adiante do teletraballo
luns, 18 de maio do 2020
O Consello Social da
Universidade da Coruña celebra este xoves 21 de maio ás 16:00 horas
unha sesión de debate arredor da liña que vimos de cruzar por mor
da pandemia COVID-19: un paso adiante na cuestión do traballo
abeirado ás novas ferramentas de comunicación que é moi probábel
que non teña volta atrás. O encontro virtual O futuro do traballo: o momento da verdade ten o obxectivo de “ofrecer unha visión xeral de como a actual
crise pode afectar as contornas de traballo e ao mercado laboral”.
Antonio Abril Abadín, presidente do Consello Social, inaugurará este evento
online, e será o encargado de presentar a Jordi Serrano,
consultor de RRHH e socio fundador de Future for Work Institute.
Serrano explicará aos asistentes tendencias e posíbeis solucións
para afrontar a era laboral postCOVID-19 na que se deberá debater,
en palabras do Consello Social, “como serán as novas formas de
traballar ou que perfís destacarán, como a nova contorna afectará
á xestión de recursos humanos ou se as empresas apostarán máis
pola Intelixencia Artificial e a dixitalización”.