A UDC xunta forzas coa campaña da CRTVG #CorazónDeInvestigadora
mércores, 14 de novembro do 2018
- A investigadora da UDC Lucía Santiago
A
campaña #CorazónDeInvestigadora
impulsada pola CRTVG para alentar as vocacións tecnolóxicas e
científicas nas nenas, ten un novo e importante apoio: o
da Universidade da Coruña, que confirmou hoxe a súa adhesión á
iniciativa, por considerar o seu labor de gran relevancia, non só
promovendo vocacións STEM nas rapazas, senón tamén por mostrar os
perfís e os percorridos de mulleres galegas referentes nestes eidos
que rompen barreiras e fan esmorecer estereotipos e prexuízos. A
campaña, que se lanza con motivo da Semana da Ciencia e a Paz da ONU
conta xa co respaldo das tres universidades galegas.
A
pedra de toque da iniciativa é un anuncio troncal para as
televisións onde unha ducia de investigadoras galegas son as
protagonistas. Nas redes esas investigadoras contarán a súa
historia a través de pequenos vídeos que rematan lanzándolle un
reto inspirador ás nenas: “E ti, que queres ser?”. Por parte da
UDC participan Luz Paz Agras, doutora arquitecta e máster en Arte,
Museoloxía e Crítica Contemporáneas da USC, amais de membro do
grupo de think tank Cadelasverdes e do Grupo de Investigación
en Composición Arquitectónica e Patrimonio (CIGAP); Marga Novales,
doutora enxeñeira en Camiños, Canais e Portos, amais de
investigadora de longo percorrido en sistemas ferroviarios de
transporte metropolitano, metro lixeiro e mobilidade sustentábel;
Susana Ladra, doutora enxeñeira en Informática, amais de
coordinadora do Campus Innova da UDC e experta en algoritmos para
optimizar as procuras de datos en Internet; e Lucía Santiago,
enxeñeira Naval e Oceánica e doutoranda na UDC, a maiores de membro
do Grupo Integrado de Enxeñaría e colaboradora de múltiples
proxectos de I+D ligados co sector naval, sendo as súas
especializades o estudo do comportamento dos buques ou o seguimento
da súa estabilidade en tempo real.
Os
vídeos poden verse na ligazón http://ww2.crtvg.es/rsc/ciencia/.
