A USC acolle un curso sobre o potencial da informática nas ciencias da vida
xoves, 17 de xullo do 2008
A informática reconstrúe
realidades. Anticípaas ou recréaas. Tendo en conta isto, o seu potencial
para avaliar e simular a vida e máis concretamente os sistemas biolóxicos
será abondo grande. Este é precisamente o alicerce da disciplina coñecida
como bioinformática, unha póla das Ciencias da Computación que é
o eixe arredor do que xira o curso de verán da Universidade de Santiago
que se está a celebrar estes días na Facultade de Matemáticas.
A iniciativa, que inclúe 30
horas lectivas, vai especialmente dirixida a abrir novos vieiros na
nosa terra para os estudos xenéticos e para a creación de fármacos.
O curso, dirixido por Xosé Antonio Álvarez
Dios, está cofinanciado pola Facultade de Matemáticas, o Instituto
de Matemáticas da universidade e a Rede Galega de Bioinformática.
Nel están a participar xa
mestres e investigadores da USC, tanto na parte máis teórica coma
na práctica, representada neste caso por catro obradoiros: de análises
de datos de microarrays, de estudos de asociación xene candidato, de
introdución ao deseño de fármacos e de ferramentas de clasificación.
