A USC dálle corpo á súa sede electrónica
xoves, 31 de xaneiro do 2013
A Universidade de Santiago está
a afianzar os alicerces da súa vindeira sede electrónica. Ou
sexa, está a impulsar a aplicación en liña, nun emprazamento
virtual concreto, de todo o que a institución implica, mobiliza,
xestiona e comunica na vida real. Así o deu a coñecer o Consello de
Goberno coa creación do regulamento para materializar a sede
electrónica da Universidade e implantar medios en liña que
faciliten o acceso total da cidadanía aos servizos que ofrece. O
gran obxectivo desta sede, que se vai pór en marcha a curto prazo,
é, amais do devandito, consolidar un espazo de relación coa
sociedade galega.
Polo tanto, estaremos ante un traballo de ampliación, en todas
direccións, do que arestora ofrece a web usc.es,
basicamente información e comunicación. A sede electrónica
pretende tirar o máximo partido do factor interacción. Deste xeito,
informa a Universidade, levaranse a cabo, no seu seo, “tódalas
actuacións, procesos e servizos que requiran a
autenticación das persoas así como aqueloutras nas que se decida a
súa inclusión por razóns de eficacia e calidade na prestación do
servizo”.