A USC, a UDC e a asociación IndesIA dan un novo pulo á formación en Intelixencia Artificial
mércores, 12 de abril do 2023
- Sinatura do convenio nunha imaxe de Santi Alvite
As
universidades
de Santiago (USC) e A Coruña (UDC) e IndesIA, asociación estatal para o impulso da
economía do dato e a Intelixencia Artificial na industria, asinaron
este luns 10 un acordo de colaboración que busca promover a
formación de profesionais en materias ligadas ao Big Data
(análise da información a gran escala) e á IA. A través desta
alianza, impulsarase a formación do alumnado nestas tecnoloxías
disruptivas, e farase a través de cursos, seminarios ou programas
formativos, así como mediante a participación das empresas
asociadas de IndesIA para a realización e presentación de casos de
uso dentro dos programas desenvolvidos ao abeiro do acordo.
Os reitores Antonio López (USC) e Julio Abalde (UDC) e o presidente de IndesIA, Valero Marín
Sastrón, formalizaron a alianza no marco dunha xuntanza na que tamén
participaron a secretaria xeral, Dulce María García Mella; o
vicerreitor de Transformación Dixital e Innovación, Gumersindo
Feijoo; o vicepresidente de IndesIA, Donato Martínez; o tesoureiro,
Pablo de la Puente; e a directora xeral da asociación, Nuria Ávalos
Villamor.
En
relación a este acordo, o reitor da Universidade de Santiago,
Antonio López, afirmou que “a unión fortalece a nosa capacidade
para avanzar e para facelo de forma máis eficiente. Sobre a base da
cooperación poderemos coñecer de primeira man as necesidades da
industria nun eido que se atopa na actualidade en plena ebulición e
desenvolvemento. Ao mesmo tempo, os nosos socios industriais poderán
ter tamén unha perspectiva realista e precisa do noso potencial e
das nosas particularidades”. Na súa opinión, trátase dunha
colaboración de especial transcendencia por fixar unha confluencia
que “sen dúbida, terá como beneficiario o noso alumnado e por
extensión a sociedade: a existencia de comunicación estreita entre
industria e universidades axudará a fornecer as sinerxías
necesarias que retroalimenten a razón de ser de cada unha das
partes”.
Dende
a asociación subliñaron que “impulsar a formación en Big
Data e a Intelixencia Artificial mediante a
colaboración con centros educativos, é unha das prioridades de
IndesIA atendendo a un dobre motivo.
- O reitor da UDC formalizando a alianza con IndesIA
Pola súa parte o reitor da Universidade da Coruña, Julio Abalde, enfatizou a habitual relación da UDC co sector empresarial para ofrecer unha mellor docencia universitaria, necesaria en todos os ámbitos, e máis aínda en temas tan novidosos como os que abarcan a enxeñaría de datos e a intelixencia artificial. Abalde destacou ademais que a UDC como universidade que imparte varios títulos de grao e máster desta área, poderá aportar pola súa parte ás empresas o coñecemento de profesorado e de persoal investigador de prestixio internacional.
No
documento, as institucións académicas comprométense a acometer a
dirección e execución académica así como o deseño das
actividades formativas dentro dos programas da área de Big
Data, e a administración dos devanditos programas,
a xestión do profesorado e a selección do alumnado, xunto coa posta
a disposición da infraestrutura e o equipamento para o
desenvolvemento das actividades, entre outros aspectos.
Pola
súa parte, a asociación realizará a valoración dos programas da
USC para a obtención do Selo IndesIA dos programas en aberto sobre
tecnoloxías da análise da información masiva, e achegará persoas
relatoras convidadas aos programas, así como casos de uso das
empresas asociadas. Tamén brindará asesoramento en materia de plans
de estudo, actividades e proxectos de investigación conxunta,
creación de Cátedras e Aulas en materia de IA e do dato, prácticas
académicas externas, participación en Feiras de Emprego
universitarias, en mesas redondas, ou titorización de TFG e TFM,
entre outros.