A USC entrega os galardóns da catorce edición dos seus premios á innovación

O venres entregáronse finalmente os galardóns da catorce edición do Concurso de Proxectos Empresariais da Universidade de Santiago, certame dirixido a recoñecer o valor e potencial de ideas innovadoras materializadas en proxectos ao abeiro da USC. O proxecto gañador (Premio Base Tecnolóxica) foi Celtalga Extract, unha iniciativa que aposta pola produción de extractos de algas procedentes das costas galegas aplicando a tecnoloxía de ultrasóns. Segundo fixeron os seus impulsores, Marivel Sánchez Guerrero e Jorge Sineiro Torres (Departamento de Enxeñaría Química), o extracto de alga empregarase na industria cosmética, sobre todo como principio activo nas súas formulacións.
O premio recibido inclúe unha dotación de 2.000 euros e a posibilidade de acadar ata 24.000 euros de financiamento a través dun préstamo participativo.
Na entrega de galardóns (presidida polo reitor Juan Viaño e o secretario xeral de Universidades, José Alberto Díez de Castro), tamén se entregaron o premio Muller Emprendedora a Chemantec (servizos de ensaios técnicos e de consultaría dirixidos a comprobar a calidade e seguridade dos produtos consumidos polos/as usuarios/as finais, sobre todo produtos do eido alimentario), e o premio Empresa Xove a MD.Use! (servizos de consultaría a medida do cliente na aplicación da dinámica molecular para a simulación computacional de sistemas biolóxicos, químicos e nanosistemas).
A USC impulsa este concurso co obxectivo de apoiar a creación de empresas innovadoras promovidas por estudantes, titulados/as e/ou investigadores/as de calquera das tres universidades galegas, así como dos centros asociados da UNED emprazados en Galicia, ademais de fomentar a innovación empresarial e a xeración de emprego.