A USC padece unha grave avaría nos seus sistemas informáticos
luns, 18 de maio do 2015
Durante os últimos días, ao intentar acceder a moitos dos
contidos en liña da Universidade de Santiago de Compostela atopamos mensaxes de
erro que indican que “o recurso solicitado está temporalmente fóra de servizo”,
o que parece vir provocado por unha avaría grave nos sistemas de
almacenamento de datos da USC que afectaría ao correo electrónico,
aplicacións en liña, cartafoles compartidos... Avaría que está a ser tratada
polo persoal técnico da Universidade e da empresa responsable do mantemento,
prevéndose que a situación volva á normalidade o vindeiro mércores.
Dende a USC aseguran que a incidencia é causa do fallo dos módulos de memoria
dos dous sistemas principais de almacenamento que xestionan a maioría da
información que se xeran da entidade educativa, e esperan que durante a xornada
de hoxe vaian arranxando distintos servizos, como a rede Wi-Fi aberta (que xa
está operativa) e unha versión temporal da páxina web do organismo.