A Universidade de Santiago xa pode operar con drons
luns, 7 de decembro do 2015
- Ramón Alberte Díaz Varela, director de operacións de RPAS da USC
A Universidade
de Santiago comunicou hoxe que xa está autorizada para traballar con
drons. O permiso para operar con vehículos aéreos non
tripulados vén da man da Axencia Espacial de Seguridade Aérea
(AESA), que é o organismo público responsábel de regular o uso de
deste tipo de aparellos cun peso máximo de 150 quilos. A orixe da
autorización expedida á USC está no desenvolvemento dun proxecto
para o seguimento e conservación de hábitats naturais impulsado
polo profesor do Departamento de Botánica da USC (Campus de Lugo)
Ramón Alberto Díaz Varela. Para dar forma definitiva a este
proxecto era preciso e imprescindíbel contar co dito permiso.
Segundo fai saber a
institución compostelá, “o recoñecemento legal da USC como
operadora de drons é un importante fito para a entidade académica,
dado o grande interese deste tipo de tecnoloxía no eido da docencia,
así como en moi diversas futuras liñas de investigación”.
Máis en detalle, a
acreditación outorgada pola AESA faculta á institución académica
compostelá para o emprego de aeronaves non tripuladas e pilotadas
por control remoto para a realización de tarefas de investigación e
desenvolvemento, así como para facer fotografías, filmacións e
levantamentos aéreos, Segundo engaden fontes da USC, “accións de
investigación e reconoñecemento instrumental, tales como
calibración de equipos, exploración meteorolóxica, marítima,
xeolóxica, petrolífera ou arqueolóxica, enlace e transmisións,
emisoras, receptor, repetidor de radio ou televisión, son outras das
operacións con drons para as que está autorizada xa a USC”. Tamén
se dá azos con este permiso para traballos de inspección
videográfica e fotográfica. Con todo, o abano de actuacións,
segundo sinala Ramón Alberto Díaz Varela, “podería ampliarse no
futuro, tanto en función da aparición de novas necesidades ou ben
debido á incorporación de novos grupos de investigación a este
tipo de pescudas nas que resulta de utilidade o emprego de aeronaves
non tripuladas por control remoto”.