A Universitat de Girona logra coa axuda de Ozona un salientábel recoñecemento aos seus servizos
mércores, 2 de novembro do 2011
- Inauguraición do Parque Tecnolóxico da Universitat de Girona, achegada pola Axencia Efe
A Universitat de
Girona vén de conseguir un importante recoñecemento ao seu labor, o
primeiro destas características que recibe unha institución, organización ou
empresa do territorio estatal. Estamos a falar da certificación ISO 20000:2011,
un aval que asegura a calidade dos seus servizos, cubrindo as seguintes liñas e
ámbitos: housing virtual, correo e
axenda, secretaría en rede e UdGMoodle (campus virtual), recursos prestados á
comunidade universitaria. A cuestión adquire aínda máis relevancia, tendo en conta
un dos grandes obxectivos da web Código Cero, salientar a innovación da nosa
terra, se temos en conta que o devandito logro foi posíbel grazas aos servizos
da empresa galega Ozona.
Segundo informa a compañía con sede na Costa
de San Marcos, Santiago, o proxecto deu comezo o pasado mes de marzo e rematou
en outubro coa certificación levada a cabo pola entidade británica BSI, que deu
conformidade a tódolos puntos do informe de auditoría no sistema de xestión de
servizos da Universitat de Girona. Grazas a este aval, a institución académica
catalá non só amosa a calidade dos seus servizos, senón que os garante. Segundo
informa Santi Cots, cap de Serveis a
l’’Usuari da Universitat, “ a participación
de Ozona foi clave no éxito do proxecto, xa que demostrou coñecemento
extraordinario dos requirimentos da norma e do proceso de certificación e
auditoría, ao que se engade un guía continua en todo o referente á adaptación
dos procedementos e as ferramentas existentes para lograr a conformidade coa
norma”.
A Universitat de Girona é unha institución pública
inserida no sistema de universidades públicas catalás. A súa finalidade é
procurar a excelencia na formación e a investigación e participar no progreso e
desenvolvemento da sociedade, a través da creación e a crítica da ciencia, a técnica,
as humanidades, as ciencias sociais e as artes.