A Xunta almacenará no CESGA os datos de preto das 30.000 análises xenómicas de pacientes que realiza ao ano
venres, 29 de xullo do 2022
O
Centro
de Supercomputación de Galicia (CESGA) vai almacenar os datos de
preto de 30.000 análises xenómicas de pacientes que o Servizo
Galego de Saúde (SERGAS) realiza ao ano. Isto será posíbel
grazas ao novo convenio de colaboración asinado entre a Fundación
Pública Galega de Medicina Xenómica e o Centro de Supercomputación
de Galicia, acto ao que acudiu o conselleiro de Sanidade, Julio
Comesaña, e ao que tamén asistiu o director da Fundación, Ángel
Carracedo, ademais de Patricia Argerey, directora da Axencia Galega
de Innovación (GAIN); e de Lois Orosa, director do CESGA. A
colaboración esténdese ao longo de máis de dez anos.
No
acto salientouse o importante labor levado a cabo pola Fundación
Pública Galega de Medicina Xenómica, coa que a Xunta colabora nas
liñas prioritarias da súa política sanitaria, destacando a
participación activa no Plan de Saúde Mental de Galicia, coa
elaboración dun estudo a través da análise farmacoxenética de
pacientes a tratamento con determinados fármacos, o que contribuirá
a axustar doses e evitar reaccións adversas. Contribuír ao bo
desenvolvemento destas e outras accións é un dos obxectivos do
acordo asinado co CESGA, que porá ao servizo da fundación un
“soporte informático axeitado e un centro de cálculo de altas
prestacións”.