A Xunta impulsará a presenza de traballadoras no sector tecnolóxico
mércores, 23 de marzo do 2022
Ante a posibilidade de que as mulleres queden fóra dos empregos do
futuro, nos que a tecnoloxía será fundamental, a Xunta avoga por
colaborar coas universidades, entidades privadas e coa comunidade
escolar para encamiñar ás nenas e ás mozas cara a formación TIC
(Tecnoloxías da Información e a Comunicación). Neste senso, o
informe As mulleres e as TICs elaborado polo Consello Galego
das Mulleres constata
que existe unha fenda no emprego entre homes e mulleres de case 35
puntos no sector.
O informe tamén recolle que en 2020, as actividades deste ámbito
empresarial xeraban máis de 24.000 postos de traballo, dos que
soamente un 32,6% eran mulleres. Outro dato que causa preocupación é
que un 30% da empresas TIC que operan en Galicia non contan con
ningunha muller no seu cadro de persoal e só no 14% dos casos existe
presenza feminina nos equipos directivos. Ademais, no informe dise
que no referido á formación profesional e universitaria, contando
que máis da metade das matrículas universitarias corresponderon en
2020 a mulleres, “a súa presenza en titulacións máis técnicas é
baixa; como é o caso de informática, onde apenas acadan o 12%; ou
nas enxeñerías, onde copan o 28% do alumnado”. A Xunta quere
referendar o seu compromiso e potenciar as vocacións tecnolóxicas
entre nenas e mozas, así como a empregabilidade no sector
tecnolóxico. Parte dos retos pasan pola sensibilización da
sociedade na diminución da fenda dixital de xénero con iniciativas
específicas de divulgación e reforzo da formación tecnolóxica
para a vida cotiá.
Existen avances tamén na tramitación do anteproxecto da Lei Galega
de Igualdade, coa que Galicia segue a situarse na vangarda da loita
contra a violencia e a discriminación da muller en todos os eidos da
súa vida.