A Zona Franca dá o seu apoio firme ao título en Ciberseguridade Industrial da UVigo

O delegado do Estado no Consorcio da Zona Franca de Vigo, David Regades, manifestou este 17 de novembro o seu “total apoio” ao primeiro título universitario de España de Especialista en Ciberseguridade Industrial, que impartirá a Universidade de Vigo a partir do vindeiro mes de xaneiro.
David Regades reuniuse co vicerreitor de Ordenación Académica e Profesorado; Manuel Ramos; a directora da Escola Aberta de Formación Permanente, María José Moure; e o coordinador do título, Ignacio Armesto (e organizador das prestixiosas Xornadas de Automatización Industrial, as JAI), que están a dar a coñecer este título propio da Universidade de Vigo a empresas e institucións ante a inminente apertura do prazo de matrícula.
O delegado do Estado mostrou o seu convencemento en que “é unha necesidade para as empresas contar con expertos na materia e unha oportunidade para Vigo e para Galicia contar coa primeira titulación universitaria nunha materia tan sensíbel para a industria”. Segundo fixo saber, cómpre concienciar, especialmente ás pemes, sobre o importante investimento que supón contar cun especialista ante ciberataques, que son cada vez máis comúns e poden ser fatais nas contornas industriais.
Os responsábeis universitarios explicaron ao delegado do Estado que existen mestrados noutras universidades sobre esta materia, pero que o da Uvigo “é o primeiro título propio dunha universidade, segundo as propias empresas especialistas na materia que achegarán docentes”.
O título contará cun claustro de profesores integrado por enxeñeiros e doutores da Universidade de Vigo, así como profesionais de prestixio de empresas como Microsoft, Siemens, Accenture, Muutech, Inprosec, Nozomi Networks ou Tecdesoft Automation.
“O curso”, salientaron na xuntanza Regades e os representantes da UVigo, “pode ser unha oportunidade de manterse ao día e renovar coñecementos para profesionais da industria e en especial do sector da informática industrial tendo en conta que a docencia se impartirá de forma telemática”.