A aplicación galega Envita Plan transforma o coidado dos maiores con atención personalizada
venres, 20 de agosto do 2021
A
empresa pontevedresa Envita, centrada en dar unha viraxe radical na
atención aos nosos maiores (ofrecéndolles proximidade,
empoderamento e atención persoal á
par que tecnoloxía, complementando a súa aposta cunha mensaxe
integral en positivo sobre a vellez e as súas necesidades),
desenvolveu unha aplicación móbil participativa e multidispositivo
para o colectivo de profesionais dos coidados que pon ao seu alcance
un amplo abano de funcionalidades.
O
seu obxectivo é “fomentar un cambio no modelo de coidados pondo no
centro o proxecto de vida das persoas maiores e engadindo unha nova
dimensión tecnolóxica á atención personalizada”. Deste xeito, a
ferramenta Envita Plan facilita a comunicación entre persoas
maiores, os profesionais e as familias, ao tempo que apoia os
proxectos de vida das primeiras, fomentando a súa autonomía e a
toma de decisións.
Novo modelo nas organizacións
Segundo
explican dende Envita, a aplicación “permite ás organizacións do
sector activar un novo modelo de intervención, obtendo unha visión
integral da persoa na que se valora a súa traxectoria de vida,
logros, rutinas, preferencias e valores, así como as súas metas e
desexos”. Ademais, “acelera e potencia a cultura dixital de todos
os profesionais implicados”.
Trátase,
engaden, “dunha ferramenta pensada para utilizar en calquera
contorna de coidados, xa ben sexa en centros ou domicilios, que
facilita a comunicación das persoas maiores, profesionais e familia
de forma segura e confidencial”.
Doada de usar
Segundo
explican dende Envita, fíxose un esforzo especial en subministrar, a
través da aplicación, “unha visión integral da persoa dunha
forma rápida e sinxela”. De aí que todos os elementos que se
ofrecen na pantalla estean orientados “a profundar no coñecemento,
preferencias, rede de apoios e axenda da persoa usuaria”. O
resultado é “un soporte flexíbel e adaptábel, que permite
acceder de forma rápida e sinxela ao verdadeiramente importante para
cada usuario”.
Amais,
incorpora entre as súas funcionalidades a plataforma de Envita
Stories, que posibilita xerar espazos para as conversas
significativas nas que se involucren tanto profesionais de referencia
como familiares.