A biblioteca pública Ánxel Casal acollerá un obradoiro de iniciación a GIMP
mércores, 30 de xullo do 2014
A Biblioteca Pública Ánxel Casal de Santiago, en colaboración co
Programa de Voluntariado Dixital da Xunta, promovido pola AMTEGA e a Dirección
Xeral de Voluntariado, organiza
un obradoiro de Iniciación ao retoque de
fotografía dixital con GIMP que terá lugar do 4 ao 8 de agosto nas
Salas de Traballo en Grupo da biblioteca.
O obxectivo deste seminario, que terá 7 horas e media de
duración e se desenvolverá en horario de mañá, é ofrecer aos usuarios formación
no eido das novas tecnoloxías e, máis polo miúdo, capacitalos no uso do GIMP,
un programa libre e gratuíto de edición de imaxes dixitais. Os participantes, a
través dunha metodoloxía eminentemente práctica, aprenderán a retocar e editar
imaxes, facer fotomontaxes e utilizar as ferramentas básicas proporcionadas
polo GIMP.
A actividade é gratuíta e será impartida por Sairlene González,
voluntaria do Programa de Voluntariado Dixital. O obradoiro vai dirixido a
persoas maiores de 18 anos, socias da biblioteca e con coñecementos básicos de
informática para un maior aproveitamento.
As persoas interesadas deberán inscribirse ata o 31 de xullo a
través do teléfono 881 999 401 ou acudindo á biblioteca, situada na Avenida de
Xoán XXIII en Santiago de Compostela.