A cidadanía da Coruña poderá enviar suxestións ao Concello a través do móbil a comezos de 2023
martes, 13 de decembro do 2022
A
cidadanía da Coruña vai poder presentar suxestións e reclamacións
ao Concello a través do móbil dende o primeiro trimestre do ano que
está a piques de comezar. Así o fixo saber o voceiro municipal
do Concello, José Manuel Lage, quen achegou detalles sobre a
inminente posta en marcha da ferramenta IRIS, un novo recurso ao que
se poderá acceder desde unha aplicación e desde o navegador web e
que “permitirá mellorar de xeito significativo a comunicación
entre os cidadáns e o Concello”.
IRIS,
comentou Lage, servirá para aumentar a comunicación cos cidadás e
posibilitará dirixir directamente as suxestións e reclamacións aos
departamentos correspondentes, “evitando trámites que demoraban a
resposta", sinalou o voceiro, engadindo que se trata dunha
aplicación que xa está en funcionamento na cidade de Barcelona e da
que dispón a Administración coruñesa grazas ao convenio asinado
polo Goberno de Inés Rey co Concello da cidade catalá en agosto de
2021.
A
súa adaptación, engadiu, está na súa última fase de
desenvolvemento e permitirá á cidadanía coruñesa “poñerse en
contacto co Concello mediante formularios claros e sinxelos”,
apuntou, engadindo que o novo sistema permitirá o envío de
fotografías e documentos, así como o seguimento de cada caso
mediante a asignación dun código. “Nos vindeiros anos seguramente
o número total de suxestións e reclamacións aumente grazas á nova
ferramenta, mais do que se trata non é de reducilo sen máis, senón
de dotar á cidadanía dun novo medio de comunicación co Concello
que contribúa a solucionar os seus problemas", apuntou José
Manuel Lage.
