A directora de AMTEGA salienta o importante esforzo galego para destacarse no panorama mundial de 5G
xoves, 14 de xaneiro do 2021
A
directora
da Axencia para a Modernización Tecnolóxica de Galicia, Mar
Pereira, participou este xoves na clausura do seminario en liña 5G,
unha revolución en marcha, organizado pola Asociación para o
Progreso da Dirección (APD) en colaboración coa operadora de
telecomunicacións Vodafone. No transcurso da súa intervención,
Pereira enxalzou o “esforzo da nosa terra por destacarse como
territorio preferente na extensión do 5G”. Neste senso, lembrou
que foi “unha das primeiras comunidades en contar cun plan para
favorecer a extensión desta tecnoloxía”.
En
termos máis concretos, recordou que ao abeiro deste plan puxéronse
en marcha iniciativas tan destacadas como a a creación dun Nodo
Galicia 5G co compromiso dos tres principais operadores (Vodafone,
Telefónica e Orange) de realizar os primeiros casos de uso. “Deste
xeito Galicia conformou un ecosistema e un contexto que favoreceu a
aposta dos operadores pola Comunidade para desenvolver as súas
iniciativas de 5G e que favoreceu que hoxe, e grazas ao impulso da
Administracións autonómica e estatal, se estean a desenvolver máis
de 30 pilotos de 5G en ámbitos como a sanidade, a loita contra os
incendios, a industria, o vehículo conectado, o turismo ou a
educación”, explicou, engadindo que o 5G “é unha das
tecnoloxías disruptivas sobre a que pivotará a transformación
dixital da vindeira década e así se recolle tamén na Estratexia
Galicia Dixital 2030, recentemente aprobada polo Consello do Goberno
Galego”.
Mar
Pereira concluíu sinalando que “o compromiso é seguir avanzando
no impulso destas redes para que Galicia aproveite ao máximo as
posibilidades do 5G, a tecnoloxía sen fíos do futuro, que
permitirá as mesmas prestacións que a fibra e, polo tanto, unha
tecnoloxía clave para mellorar a conectividade nun territorio
caracterizado pola dispersión e a complexidade orográfica”.
Segundo
apuntou, o novo estándar móbil posibilitará a disposición de
servizos avanzados en moitos ámbitos, especialmente en eidos clave
como a sanidade e a educación, desenvolver novos modelos de negocio
e consolidar a especialización tecnolóxica no territorio.