A edición 2013 do Laboratorio Audiovisual de Vedra ponse revolucionaria
luns, 28 de xaneiro do 2013
Seunpeso
Producións, mestura de
selo profesional e colectivo de creadores independentes de todo, con
sede no concello coruñés de Vedra, está a presentar estes días,
facendo ben de rebumbio na Rede, unha nova edición do seu LAV,
Laboratorio Audiovisual de Vedra. Malia tratarse, como o seu propio
nome indica, dunha xuntanza creativa sobre audiovisual, o certo é
que os seus promotores non queren, unha vez máis, deixar pasar a
oportunidade de tocar cuestións que van estreitamente cinguidas ao
feito de facermos unha curta, unha longametraxe ou un vídeo-clip.
Falamos das novas tecnoloxías da información. En representación
destas, o programa contará cunha parte importante da súa vertente
máis libre de
ataduras e licenzas
na nosa terra.
Por
exemplo os membros da Comunidade
O Zulo, que nos lembrarán entre
outras cousas
que xa hai unha chea de ferramentas abertas das que tirar partido no
audiovisual. As diversas actividades celebraranse na segunda e a
terceira fin de semana da febreiro. LAV013 achegará, segundo nos
contan os seus responsábeis, unha cumprida ración de obradoiros “xa
clásicos”
con outros máis ligados aos tempos convulsos nos que andamos. Entre
os obradoiros preparados, a intención é abranguer cuestións útiles
e prácticas ao tempo que se fornecen guías e recomendacións para
crear do xeito máis económico e rendíbel: vídeos de combate,
loita escénica, radio Internet e podcasts,
son en produción audiovisuais, documentais web, videoclips,
dirección artística en clave low
cost,
o intérprete ante a cámara, animación
stop motion,
etc.
Por
certo que ao abeiro de LAV013 desenvolverase o sábado 23 unha xeira
de actividades cun ingrediente especialmente combativo e
revolucionario, acubilladas no evento RevoLAV. Nesta xeira de
traballo e presentacións participarán, precisamente, os
membros de O
Zulo, que van
falar
das vantaxes do software e as redes libres como canle e recurso para
crear, divulgar ou promover, e todo do xeito máis económico e
rendíbel. Estas charlas e obradoiros de
RevoLAV
desenvolverase o día 23 de febreiro, sábado, en horario de tarde,
no Centro Social da Terceira Idade de Vedra. Amais do devandito,
tamén haberá un oco para música (da man de Malasombra e A Requinta
da Laxeira), monólogos (Carlos Santiago, Avelino González), teatro
(Simone Negrín) e relatorios (Paulo Rubido sobre a Enerxía
senunpeso e
César Lema sobre Calorías,
vátios e outras formas de gastar os cartos).
De xeito paralelo, na mesma xornada do sábado, desenvolverase o
Mercado RevoLAV, que é un mercado de troco e compra-venda
audiovisual no que poderemos atopar de todo: aparellos, tecnoloxía,
DVD, VHS, libro, vestiario, atrezzo,
etc.