A ex presidenta de Google Iberia falará en Vigo, Santiago e A Coruña de como medrar no futuro inmediato
venres, 27 de marzo do 2015
Isabel
Aguilera, ex presidenta de General Electric e Google Iberia, estará
en abril en Galicia para amosar a súa visión sobre cales son os
ingredientes básicos que un profesional e unha empresa deben ter en
conta no camiño de medrar a curto e medio prazo: nos días que
estamos a vivir e nos días inminentes. Aguilera participará en tres
relatorios nunha mesma xornada (o 8 de abril) e en tres cidades
diferentes: en Vigo de 9.30 a 11.30 horas (Hotel Os Escudos) en
Santiago de 13.45 a 16.30 horas (Hotel A Quinta da Auga) e en Coruña
de 18.00 a 20.00 horas (Hotel Attica 21). As sesións, que veñen da
man de APD, desenvólvense baixo o seguinte epígrafe: Competir no
futuro inmediato. Para máis información,
APD habitou un documento en pdf específico.
Os
relatorios, como dixemos, xirarán arredor do futuro a curto prazo e
das cousas que cómpre facer, a nivel empresarial, non só para que o
tren non nos colla, senón para irmos por diante del. Segundo avanza
APD na presentación da tripla xornada, “o que estaba por chegar xa
está aquí e, se conseguimos adaptarnos talvez poidamos sobrevivir,
pero non acadaremos as posicións de liderado ás que aspiramos”.
APD, reflectindo o avance dos contidos da relatora, sinala que
“cómpre anticipar os cambios a través do seguimento das
tendencias globais de meirande impacto no mundo económico e
empresarial e concluír cales serán os principais desafíos que as
empresas de cada sector, de todos os sectores, deben afrontar”. Nas
sesións de Isabel Aguilera analizaranse polo tanto que competencias
e que ferramentas son clave e como desenvolvelas “para instrumentar
a devandita superación sen temores”.
Isabel
Aguilera foi presidenta de General Electric e Google
Iberia. É arquitecta de formación con dúas especialidades
(Edificación e Urbanismo) pola ESTA de Sevilla. Ademais, é
conselleira independente en Indra, BMN (Banco Mare
Nostrum), Aegón España e Emergia, S.L., amais de membro do consello
asesor de Deusto Business School; fundadora de Isabel Aguilera
Consultoría Empresarial en Estratexia, Operacións e Innovación,
accionista de Twindocs, así como relatora habitual da axencia de
conferenciantes Thinking Heads e profesora asociada de ESADE. Foi
conselleira independente de Laureate Universities Inc, até a súa
reprivatización, membro do Consello Social da patronal
Farmaindustria, de Pelayo Mutua de Seguros e da empresa de enxeñaría
IKOR Sistemas.
Foi distinguida con
diferentes recoñecementos institucións e asociacións de
empresarios (AED, FEDEPE, etc), así como diarios e publicacións
nacionais e internacionais entre os que destaca Financial Times,
Wall Street Journal ou o El Mundo, así como outros medios especializados en tecnoloxía.