A expedición do galego Pablo Pérez chega ao Everest co apoio da tecnoloxía de e-saúde de Telefónica
martes, 11 de setembro do 2012
Pór
de relevo a importancia de desenvolver métodos, con axuda das novas tecnoloxías,
que contribúan a mellorar a nosa saúde e a calidade de vida das persoas con
diversas doenzas, dependencias ou diversidades funcionais ou motrices. Esta é,
por así dicilo, a mensaxe que vén de lanzar o galego Pablo Pérez, de 21 anos,
na expedición ao Everest da que forma parte, arestora no campamento base (a
5.350 metros) da dita montaña do Himalaia. Dase a circunstancia de que non se
trata dunha expedición calquera. Para comezar, está integrada por deportistas
diabéticos que, ademais, tiran partido de diversas tecnoloxías de Telefónica
aplicadas á saúde para facer posíbel esta complexa ascensión. A chegada á
estación base rexistrouse este luns 10 de setembro ás 9.00 horas, horario
español.
Pablo
Pérez, como dixemos, non está só na súa aventura. Acompáñano Josu Feijó, Jon
Goikotxea, Elena Eggers, Beatriz Gª Berche e Roberto Martínez. Afectados de
diabetes tipo I, acadaron o seu obxectivo unha xornada antes do previsto. Co
fin de logralo sen maiores riscos para a saúde dos que pode achegar, en
circunstancias normais, a dita montaña a un deportista sen diabetes, os
devanditos montañeiros manteñen contacto cos seus médicos e nutricionistas
grazas a un servizo de eHealth de Telefónica Dixital que lles permite controlar
en remoto os parámetros da súa doenza.
A
viaxe polo Himalalla comezou o pasado 31 de agosto e está previsto que remate
este 18 de setembro. Durante todo este tempo empregarán o dito servizo de xestión
de doentes crónicos de Telefónica Dixital, constituíndo esta a primeira vez que
un grupo de diabéticos insulino dependentes emprenden unha aventura deste tipo.
E todo, sinala Telefónica, “coa tranquilidade que lles achega, tanto a eles
como aos seus familiares, o saber que os seus parámetros vitais están a ser
controlados polos seus médicos e nutricionistas habituais”.
Para
accedermos a máis información sobre esta iniciativa, está
na Rede o blog específico de seu, Diabéticos no Everest, onde se dá
conta dos principais feitos da aventura, máis que nunca a xeito de caderno de
bitácora e da man dos propios expedicionarios, que informan polo miúdo dos
detalles do seu día a día nunha das paraxes máis hostís e, á vez, máis
impresionantes de todo o planeta Terra.