A ferramenta galega Coquus revoluciona a alimentación dos pacientes hospitalarios
mércores, 28 de xullo do 2021
Novos
Sistemas de Información, histórica empresa TIC da nosa terra, ten
implantada a súa ferramenta Coquus
en hospitais públicos e privados de todo territorio estatal. A
ferramenta ten a súa orixe no obxectivo de mellorar a alimentación
dos pacientes hospitalarios mediante a dixitalización e
automatización da xestión das dietas, manexando para iso un alto
volume de datos sobre ingresos e altas de pacientes, as súas
necesidades e gustos ou a tipoloxía de alimento. Coquus
pon en xogo importantes melloras en seguridade do paciente, en
eficiencia e xestión dos controis dos menús e en aforros de tempo e
de traballo (optimizando os recursos hospitalarios).
Por
certo que a empresa foi unha das 20 pemes seleccionadas para o
programa Connect-19, a aceleradora de empresas especializada na
comercialización de solucións innovadoras fronte ao impacto da
COVID-19, impulsada pola Xunta e Tecnópole.
Para
reducir o impacto social e económico producido pola COVID-19 o
equipo de Coquus deu un extra de impulso á ferramenta, incluíndo
consellos e mensaxes motivadores nos habituais cartóns de empratado,
converténdoas nunha nova canle de comunicación co paciente.
Tal
como explica Alberto Lázaro, director de Desenvolvemento de Negocio
en Novos Sistemas de Información, “a principal aposta foi
posibilitar os cribados nutricionais e o control de inxesta, o que
permite aos equipos de nutrición loitar contra a Desnutrición
Relacionada coa Enfermidade (DRE), un problema que afecta a máis do
25% das persoas hospitalizadas e que ten unha incidencia especial nos
afectados pola COVID-19. É importante saber se a persoa se atopa en
estado de desnutrición e se tomou toda a comida ou non”.
Os
responsábeis da firma destacan que “en moitos hospitais utilizan
xa programas de xestión de dieta, pero o nivel de automatización é
moi baixo. Séguese a facer moito traballo manual, o que significa
menor atención persoal e con iso, peor nutrición, maiores riscos de
seguridade, máis persoal dedicado a tarefas administrativas en
detrimento das clínicas… por tanto, maior custo”.
O
Complexo Hospitalario Universitario de Santiago de Compostela
encargou a Novos Sistemas de Información o reto de mellorar todo o
proceso implicado na alimentación dos pacientes e así nace a
primeira versión de Coquus.
A
Tecnópole de Ourense (Parque Tecnolóxico de Galicia) confirma que a
empresa está a medrar en España e introducindo Coquus noutros
países europeos, “con contactos moi avanzados en Portugal e
incipientes en Reino Unido”. Ademais, participan nun proxecto
europeo cun consorcio internacional liderado por hospitais, que están
a facilitar a súa entrada noutros mercados do continente. Tamén
reciben solicitudes frecuentes de países como Arxentina ou México.