A firma galega A&B Shop xuntou preto de 85.000 seareiros dixitais en seis meses
xoves, 29 de xuño do 2017
Pode
unha iniciativa empresarial innovadora suscitar interese e ter éxito
empregando as redes sociais como única canle de comunicación e
promoción? Estamos preparados para isto? Segundo as creadoras de A&B
Shop, nova firma de roupa galega, a resposta ás devanditas dúas
preguntas é sen lugar a dúbidas positiva. Así nolo contan Ana
Casal Vidal e Begoña Colomer Calvo, as responsábeis dunha nova
firma téxtil que vende roupa en liña (e off-line)
e que xa conta (complementándoo cunha intensa campaña de captación
de seareiras/os nas redes, un “colectivo” que xa anda preto dos
90.000) con establecementos físicos en Arteixo e na rúa Barcelona
da Coruña.
Segundo
apuntan, o segredo do éxito dunha PEME, hoxe en día, apóiase en
parte en combinar as canles tradicionais cun uso eficaz dos novos
espazos comunicativos que brinda a Internet. Logo, por suposto, están
os propios valores da iniciativa empresarial en cuestión. Estes
valores, no caso de A&B Shop, teñen que ver cunha vontade de
“vender roupa urbana, alternativa e moderna” e, ademais, facelo
abranguendo e implicando ao máximo a todos os integrantes dunha
familia. Ou sexa, vestindo igual a nais, fillas, pais e fillos e sen
deixar a ningún integrante fóra.
A
súa estratexia recente en liña comezou en 2016. A idea que sostivo
a iniciativa foi a devandita de vestir da mesma maneira a nais e
fillas e a pais e fillos, cousa que as levou a buscar provedores e
fabricantes e, logo de atopalos, en setembro de 2016, a abrir tenda
no mercado municipal de Conchiñas. Segundo contan, a súa única
publicidade son as redes sociais. “En tan só 6 meses”, sinalan,
“A&B Shop foi quen de xuntar máis de 83.500 seareiras e
seareiros e incrementou as súas vendas nun tempo marca”. Este
interese, ademais, alentou a produtividade da firma, que foi quen de
crear un centenar de deseños en só medio ano.
O
proceso de dar a coñecer os deseños é o seguinte: unha vez
creados, elíxese o tecido e realízase unha mostra para nai e filla
ou pai e fillo; se gusta, procédese a dar a orde de fabricación. “A
maioría das veces son as empregadas as que se proban a roupa
converténdose nun momento especial”, explican Ana e Begoña,
engadindo que logo do devandito realízanse as fotografías das
pezas, “ás veces con modelos e outras son os propios clientes”,
e publícanse na web e nas redes sociais, no Facebook
propio de A&B Shop (onde xunta preto de 90.000 seguidores) e
máis no Instagram.