A galega Cie amosa este 6 de xuño en Santiago diferentes tecnoloxías para aforrarmos en enerxía
martes, 4 de xuño do 2013
En
contra do que moitas persoas alleas ás novas tecnoloxías poden
supoñer, estas, empregadas dun xeito eficaz e rendíbel, teñen
potencial para controlar no seo dunha empresa o gasto de enerxía. De
feito, nos últimos anos, en parte debido á nosa maior
responsabilidade co medio ambiente, en parte pola crise e en parte
polos incrementos sucesivos de custe das enerxéticas, proliferan
programas e aplicacións destinados de xeito específico a axudarnos
a ter facturas menos desorbitadas. Co fin de amosar estas
posibilidades das TIC e as achegas concretas da empresa galega Cie
Tecnoloxías, o Centro Demostrador TIC (CDTIC) de Santiago a
colle este xoves 6 de xuño, en horario de 10:00 a 14:00 horas, a
xornada Redución de custos mediante a implantación de sistemas de
xestión enerxéticas, organizada pola dita firma.
Segundo
avanzan fontes do Centro a respecto da cita, poñendo aos asistentes
en situación, “a aplicación das Tecnoloxías da Información e
Comunicacións (TIC) para reducir o consumo enerxético, ten como
potencial vantaxe que as organizacións podan acadar unha maior
eficiencia económica debido á redución de custes enerxéticos, a
obtención de incentivos fiscais e a optimización das súas
operacións”.
Durante
a sesión participarán expertos nos sistemas de xestión enerxética
a través do uso das TIC que amosarán como reducir custos
enerxéticos, así como, os pasos a realizar para acadar unha xestión
eficiente da enerxía e realizarán un análise das variábeis Capex,
Opex e ROI á hora de afrontar un proxecto de implantación dun
sistema de eficiencia enerxética. A actividade rematará cun exemplo
práctico dun caso real no uso da plataforma de xestión enerxética
de CIE Tecnoloxías, baseada nun entorno cloud, para a
xestión enerxética das instalacións do cliente.
A
sesión vai dirixida tanto a medianas e grandes empresas, como a
organismos públicos. A asistencia é de balde, condicionada ao aforo
da sala e previa
inscrición en liña na web do Centro Demostrador TIC.
Empresa especializada en sistemas de comunicacións
Cie Tecnoloxías é unha empresa galega de servizos TIC con máis de 20 anos de experiencia no sector, achegando valor engadido ao deseño, desenvolvemento e integración de todo tipo de sistemas de redes e comunicacións. Dentro das áreas de negocio da empresa destacan ás infraestruturas físicas (centros de datos, sistemas de control e acceso, ...), comunicacións unificadas (VoIP, electrónica de rede, sistemas de seguridade, ...) e servizos de enxeñería, soporte e mantemento.