A galega Coinscrap pecha unha rolda de financiamento de 180.000 euros
luns, 29 de xullo do 2019
A
firma tecnolóxica galega Coinscrap,
que dá nome a unha aplicación que nos permite redondear as nosas
compras con cartón de crédito ou débito pasando a diferenza entre
a compra e o redondeo a unha conta de aforro, vén
de pechar unha rolda de financiamento de 180.000 euros na que
participaron Indexa Capital, Fernando Cabelo-Astolfi (Aplazame) e
BBooster Ventures. Segundo apuntaron os impulsores da empresa,
coa devandita rolda o obxectivo foi acadar o afianzamento como un
referente estatal en materia de plataformas de micro-aforro.
Amais,
engaden, coa entrada en xogo dos novos axentes de investimento,
fortaleceuse o rumbo de Coinscrap cara a incorporación no seu
capital de “perfís clave dentro do sector financeiro”.
O
meirande investidor desta rolda foi Bbooster Ventures, entidade
xestora de capital risco que desde 2010 investiu en máis de 100
novas firmas innovadoras. Bbooster, a día de hoxe dirixida por
Enrique Penichet, Macarena Poletti e Raquel Bernal, ten as súas
grandes fitos de mercado, como Traventia ou Streamloots, entre
outros.
Indexa,
pola súa banda, é un xestor automatizado referente en España, con
máis de 200 millóns de euros baixo xestión e liderada por Unai
Ansejo e François Derbaix.
Pola
súa banda, Fernando Cabelo-Astolfi é fundador e director executivo
de Aplazame (vendida a Wizink Bank en 2018). Fundou tamén Ibercheck,
fito español en emisión de informes de crédito para persoas
físicas.
A
estas importantes novidades relativas ao futuro de Coinscrap cómpre
sumar outro gran acontecemento do ano pasado: o peche dun
acordo con EVO Banco para ofrecer aos clientes desta entidade as
vantaxes da devandita ferramenta galega en materia de aforros,
aplicábel non só ás compras senón tamén aos cargos por recibos
ou transferencias bancarias. A finalidade de EVO Banco coa dita
incorporación foi integrar na súa banca móbil unha hucha dixital
próxima ao usuario e doada de empregar, digna de confianza e, tamén,
automatizada.
Ferramenta
de micro-aforro
Coinscrap é unha ferramenta
encamiñada a aforrar e investir en carteiras intelixentes e en base
a “uns obxectivos financeiros establecidos previamente”. Achega,
en palabras dos seus responsábeis, “un funcionamento sinxelo e
intuitivo”, fornecendo cousas como a posibilidade de redondear ao
euro máis próximo cada unha das compras que fagamos co noso cartón
de crédito ou débito, e transferindo logo a diferenza a unha conta
corrente (ou investíndoa nun seguro de aforro).
O usuario pode
acceder ademais en calquera momento ao seu historial de aforro e
coñecer a porcentaxe de cumprimento do obxectivo fixado ou
modificar, en función das súas posibilidades, as cantidades que
destina a este fin. A ferramenta emite tamén alertas no caso de que
o usuario se estea desviando do seu obxectivo financeiro e ofrécelle
consellos sobre que facer para seguir no bo camiño. A súa principal
diferenza con outras solucións do mercado é “que Coinscrap pode
ser utilizada con cartóns de calquera entidade
bancaria”.
Desenvolvida por David Conde (Pontevedra), Óscar
Barba (Ourense), Diego González (Ourense) e Juan Carlos López
(Vigo), a versión de aforro desta aplicación móbil estará
operativa a finais deste ano, mentres que a de investimento chegará
ao mercado en 2017.