A galega Genome4care quere revolucionar a loita contra o cancro e as doenzas raras con Intelixencia Artificial
luns, 29 de xuño do 2020
A
confluencia entre saúde e novas tecnoloxías é xa, a estas alturas,
unha fonte inesgotábel de boas novas na nosa terra. Deste ámbito
específico de traballo onde se xuntan a medicina avanzada e os
sistemas intelixentes é de onde xorde Genome4Care,
unha nova spin-off da USC (Universidade de Santiago) que
desenvolve ferramentas diagnósticas para persoas con doenzas raras
ou oncolóxicas combinando xenómica con Intelixencia Artificial.
O
seu obxectivo é atopar “marcadores xenómicos para explicar a
aparición de enfermidades con base total ou parcialmente xenética”,
unha cuestión vai alén do simple diagnóstico destas enfermidades,
por exemplo “permitindo establecer prognósticos, dar tratamentos
precoces, preventivos e personalizados e favorecer un asesoramento
xenético axeitado para as familias”, explican os responsábeis
desta nova empresa galega, engadindo que as tecnoloxías que poñen
en xogo a posibilidade de facer terapias personalizadas e optimizadas
para as persoas con cancro.
Os
socios deste novo proxecto son, ademais da propia universidade, José
Castro Tubío, responsábel de I+D para oncoloxía e investigador da
USC na vangarda da xenómica do cancro; Aurelio Berna, experto en
bioinformática e IA; Manuel Fondevila experto en xenética forense e
para a identificación; e Ana F. Marmiesse, especialista en xenética
humana e directora de operacións e desenvolvemento de produto.
José,
Aurelio, Manuel e Ana son especialistas en buscar cambios de todo
tipo no xenoma humano que expliquen a aparición de enfermidades de
base xenética, e para este fin teñen como punto de partida a
tecnoloxía de secuenciado masiva de segunda e terceira xeración, e
sobre todo as ferramentas bioinformáticas e de Intelixencia
Artificial para a transformación e interpretación de datos a gran
escala (Big data).
Genome4Care
forma parte de BioIncubatech, a primeira bioincubadora de Galicia e a
a única en España especializada en proxectos biotecnolóxicos
aplicados á saúde e ao sector agroalimentario. Conxuga dotación de
infraestruturas e programas de incubación e aceleración, para
conseguir atraer talento emprendedor e resultados de investigación
de todo o mundo a Galicia. Nestes momentos acolle 22 proxectos, a
maioría pertencentes ao sector da saúde e, en menor medida, ao
sector agroalimentario. Está xestionado pola Área de Valorización,
Transferencia e Emprendemento da USC.
O
proxecto, que conta coa colaboración de Uninova e a Cámara de
Comercio de Santiago, está financiado pola Fundación INCYDE na súa
convocatoria 2018 de Incubadoras de Alta Tecnoloxía para o
fomento da Innovación e a transferencia de tecnoloxía a micropemes
(Fondos FEDER), e cofinanciado pola Axencia Galega de Innovación
(GAIN) da Xunta de Galicia.