A galega Sivsa achega o seu software de xestión a un dos meirandes hospitais de Brasil

A empresa de raizame galega Sivsa (con sede central en Vigo) está a levar os seus desenvolvementos tecnolóxicos a diversos eidos de actividade en Sudamérica, sendo o caso máis recente o da achega do seu software de xestión sanitaria ó Hospital Paulista de Brasil, un dos máis senlleiros do país. Así o fixo saber estes días Caixanova (que conta con participación na dita compañía) nun comunicado no que se indican algunhas das caracerísticas do servizo de xestión especializado. Este desenvolvemento, chamado Hosix, abrangue tódolos eidos da actividade hospitalaria e permite o control dos mesmos a través de tecnoloxía web.
O Hospital Paulista, segundo sinala Caixanova, será o primeiro do país xestionado a través dunha plataforma de rede, o que vai repercutir (engade) nunha meirande e mellor calidade de atención ás persoas ingresadas, ó permitirlles ós facultativos o acceso inmediato á información relativa a aquelas.
Sivsa ten a súa sede central en Vigo mais conta con filiais en Portugal, Brasil (onde ten xa 16 clientes, logo da contratación dos servizos por parte do Hospital Paulista), Perú e Chile. Trátase dunha empresa especializada no deseño de software, tratándose sobre todo de solucións encamiñadas ó eido da sanidade, a banca e ó sector industrial en xeral.