A interrelación entre informática e xustiza, ao detalle nas xornadas que organiza o CPETIG o día 25 en Santiago
martes, 15 de outubro do 2013
O outono é sen dúbida
pródigo en eventos relacionados coas novas tecnoloxías, algúns
deles de índole xeral e tratando de abranguer o meirande número de
temáticas TIC e outros deles máis específicos e, cremos nós, de
meirande alcance e fondura. Entre estes últimos sitúase sen dúbida
unha cita galega prevista para este venres 25 de outubro, a
terceira edición das Xornadas
de Informática Xudicial e Delitos Informáticos que
organiza o Colexio Profesional de Enxeñaría Técnica en Informática
de Galicia (CPETIC) na Cidade da Cultura (Santiago) co obxectivo de
avaliar os recursos
TIC como instrumentos de investigación policial e, tamén, como
espazos de investigación en si mesmos, facéndose fincapé este ano
na cuestión da ciberseguridade.
Para
isto, para avaliar
estas cuestións polo miúdo,
contar
con relatores de primeiro nivel achegando o seu coñecemento e a súa
experiencia en eidos
de gran interese non só para os profesionais dos
departamentos TIC e dos despachos xudiciais,
senón tamén para a cidadanía en xeral, directamente implicada no
desenvolvemento deste punto onde se xuntan e interactúan informática
e xustiza.
A
nova convocatoria destas xornadas, que se insiren no
convenio asinado recentemente entre o CPETIG e a Axencia
para a Modernización Tecnolóxica de Galicia (AMTEGA), xirarán
como dixemos arredor da cuestión da ciberseguridade, que será por
así dicilo a columna vertebral do encontro xunto con outros ámbitos
de especial relevancia: os sistemas forense de intrusión, segundo
explica o Colexio unha cuestión de gran alcance por mor do seu
impacto social. Asemade, a revisión destes temas tan actuais farase
dende a perspectiva dos dereitos dos cidadáns e do traballo das
entidades encargadas da persecución destes delitos.
A salientar -como
novidade- que se contará coa presenza dun órgano europeo, grazas á
participación de Manuel Álvarez Sobredo, responsábel da
introdución do Centro Europeo contra o Cibercrime (EC3), entidade
integrada na Europol e que centraliza a loita contra este tipo de
actividades na Unión Europea. Lembrar tamén que a estas xornadas
asistirán un grupo de expertos, que achegarán a súa visión global
dende eidos tan diversos como o da avogacía, a maxistratura, a
fiscalía, as forzas de seguridade, o Ministerio de Xustiza e como
novidade, as novas axencias internacionais.
Para inscribirse
nestas xornadas de Ciberseguridade e sistemas forenses de
intrusión, ou consultar máis información, cómpre visitar a
web habilitada para o
evento.
Estes encontros do CPETIG
contan co financiamento de AMTEGA e a Xunta e a colaboración directa
do bufete de avogados Pintos & Salgado e da empresa compostelá
Coremain.
A
continuación, damos conta do programa.
Sesión de Mañá
- 9:00 Horas
Recepción e entrega de material.
- 9:15 Presentación a
cargo de Mar Pereira, directora da Axencia para a Modernización
Tecnolóxica de Galicia.
- 9:30 Primeiro Relatorio
O uso de troianos para a investigación de delitos no proxecto de
novo Código Procesual Penal, a cargo de David Maeztu (avogado
especializado).
- 10:15 Segundo Relatorio
Riscos da ciberseguridade nun mundo hiperconectado,
a cargo de Alberto Redondo Sánchez (capitán da Garda Civil, Unidade
Técnica de Policía Xudicial Xefe do Grupo Delitos Tecnolóxicos)
- 11:00 Descanso e café
- 11:30 Terceiro Relatorio Os novos medios de
proba electrónica no procedemento xudicial, por Eloy Velasco
(maxistrado)
- 12:15 Cuarto Relatorio, O rápido
desenvolvemento da delincuencia no ciberespazo na
Unión Europea e o papel do Centro Europeo de
Ciberdelincuencia (EC3) para mitigar este problema, a
cargo de Manuel Álvarez Sobredo, head of implementation,
EC3, EUROPOL
- 13:00 Mesa Redonda (1h) De SITEL a PRISM: da
ciberseguridade á ciberespionaxe,
Onde está o límite? Moderador Javier Sanz Larruga (catedrático
de Dereito Administrativo - Universidade da Coruña)
- 14.00 Xantar
Sesión de Tarde
- 16:30 Quinto Relatorio, Retos da fiscalía ante
o auxe dos delitos informáticos e dos novos medios de proba, a
cargo de Marta García de la Concha (fiscal especializada en
Criminalidade Informática da provincia de Pontevedra)
- 17:15 Sexto Relatorio, Cara a unha Xustiza
Dixital, a cargo de Joaquín Silguero Estagnan (secretario xeral
da Administración de Xustiza)
- 18:05 Clausura a cargo de Alfonso Rueda.
vicepresidente e conselleiro de Presidencia, Administracións
Públicas e Xustiza da Xunta de Galicia.